Qazaqstanda brakonerlik úshin jaza kúsheıtildi
«Turaqty qorǵaýdyń arqasynda 2021 jyldyń qorytyndysy boıynsha kıik sany 842 myńǵa jetti. Janýarlardyń sırek kezdesetin joıylyp bara jatqan túrlerin, onyń ishinde kıikterdi qorǵaý jalpy aýdany 123 mln ga bolatyn 12 oblys aýmaǵynda júrgiziledi. Onda 430 ınspektor jáne 152 avtokólik quraly jumyldyrylǵan. 2019 jyly qaıǵyly oqıǵalarǵa baılanysty bizdiń úsh ınspektorymyz qaza tapty, Memleket basshysy brakonerlikpen kúres boıynsha túbegeıli jáne kezek kúttirmeıtin sharalar qabyldaýdy tapyrdy», - dedi D. Turǵambaev Ortalyq kommýnıkatsııalar qyzmetinde ótken baspasóz máslıhatynda.
Spıker 2020 jyldyń qańtarynda «Qazaqstan Respýblıkasynyń keıbir zańnamalyq aktilerine qylmystyq, qylmystyq is júrgizý zańnamasyn jetildirý jáne jeke adamnyń quqyqtaryn qorǵaýdy kúsheıtý máseleleri boıynsha ózgerister men tolyqtyrýlar engizý týraly» QR Zańy qabyldanǵanyn eske saldy. Sanktsııalardy qatańdatý bóliginde 335 jáne 337-baptarǵa túzetýler kúshine endi, ıaǵnı qylmystyq teris qylyqtar qylmysqa aýystyryldy jáne 337-bapqa 10 jylǵa deıin bas bostandyǵynan aıyrý sanktsııasy engizildi.
«339-bapqa kıikti, onyń bólikterin nemese derıvattaryn, onyń ishinde kıik múıizderin zańsyz alýdy, satyp alýdy, saqtaýdy, ótkizýdi, ákelýdi, áketýdi, jóneltýdi, tasymaldaýdy nemese joıýdy kózdeıtin 1-1-bólik engizildi, ol úshin sanktsııa 3 jyldan 5 jylǵa deıin bas bostandyǵyn shekteýdi ne aıyrýdy kózdeıdi, múlki tárkilenedi. 380-1-bapta janýarlar dúnıesin qorǵaý jónindegi memlekettik ınspektorlardyń jáne janýarlar dúnıesin qorǵaý jónindegi qoryqshynyń ómirine qolsuǵýshylyq úshin qylmystyq jaýapkershilik kózdelgen. Sondaı-aq, janýarlar dúnıesin qorǵaý jónindegi memlekettik ınspektor men janýarlar dúnıesin qorǵaý jónindegi jáne qoryqshyǵa qatysty kúsh qoldanǵany úshin 12 jylǵa deıin bas bostandyǵynan aıyrylatyn qylmystyq jaýapty kózdeıtin jańa 380-2-bap engizildi», - dedi Danııar Turǵambaev.