Qazaqstanda brakonerler 12 jylǵa deıin sottalýy múmkin

NUR-SULTAN. QazAqparat - QR Ekologııa, geologııa jáne tabıǵı resýrstar vıtse-mınıstri Erlan Nysanbaev brakonerlerge jazanyń qanshalyqty kúsheıgenin aıtyp berdi, dep habarlaıdy QazAqparat tilshisi.

Jańa ózgerister «QR keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» QR zańynda kórsetilgen.

«Buǵan deıin Qylmystyq Kodekste jalpy norma bolsa, endi naqtylanǵan normalar paıda boldy. Munda múlikti tárkileý múmkindigi bolady. Jazany kúsheıtý boıynsha sharalar kesheni óz nátıjesin beredi dep oılaımyn. Ańshylyq quraly, qarý-jaraq, kólik, balta, rıýkzak jáne ózge de zattar tárkilenedi», - dedi E. Nysanbaev Ortalyq kommýnıkatsııalar qyzmetinde ótken baspasóz máslıhatynda.

Sonymen birge, orman, balyq jáne janýarlar álemindegi zańbuzýshylyqtar úshin jazany kúsheıtý boıynsha QR Qylmystyq Kodesine túzetýler engiziledi. Odan bólek, sheteldikterdi jasaǵan qylmysy úshin 5 jylǵa el aýmaǵynan shyǵarý qarastyrylǵan.

«Zańsyz ańshylyq úshin qylmystyq sheshim belgileri keńeıtildi jáne sanktsııalar ulǵaıdy. Máselen, buryn osy bap boıynsha brakonerler ańshylyqta janýarǵa zardap keltiretin jarylǵysh quraldar, keme men qarda júretin mashına qoldanǵanda ǵana jazalanatyn edi. Endi onda atý quraly, pnevmatıkalyq jáne sýyq qarý, ıtter men ańshylyq qustary engizildi. Brakonerler jazaǵa tartylatyn QR QK 339-baby jetildirildi. Buryn 5 jylǵa deıin bas bostandyǵynan aıyrý jazasy berilse, endi bul jaza 12 jylǵa sozylady. Zańnamany jetildirý jumystary áli de júrip jatyr», - dedi E. Nysanbaev.