Qazaqstanda bir jylda 80 myńnan asa adamǵa qaıyrymdylyq jasalǵan

<p>ASTANA. KAZINFORM - Respýblıka kúni qarsańynda qaıyrymdy jandardyń forýmy ótti. Bul týraly Mádenıet jáne aqparat mınıstrligi habarlady.</p>

Astanada ótken aıtýly jıynda memlekettik organdardyń, qaıyrymdylyq uıymdarynyń, jeke sektor ókilderi men eriktiler, metsenattar bas qosty.

Bul shara Qazaqstan Respýblıkasy Mádenıet jáne aqparat mınıstrligi, biryńǵaı grant operatory jáne «Qazaqstan damý assotsıatsııasy» zańdy tulǵalar qaýymdastyǵynyń qoldaýymen uıymdastyryldy. Forým azamattar men uıymdardyń qaıyrymdylyqty damytýǵa jáne halyqtyń áleýmettik osal toptaryn qoldaýǵa qosqan úlesin taný alańy boldy desek qatelespeımiz. Forým qaıyrymdylyq jasap, eldiń qurmetine bólengen qurmetti ataqqa laıyq laýreattardy marapattaý rásimimen ashyldy. Mádenıet jáne aqparat mınıstri Aıda Balaeva óziniń beıne joldaýynda Qazaqstanda qaıyrymdylyq jasaý mádenıetin damytýdyń mańyzdylyǵyn atap ótti.

Ol árbir azamat ózgeniń ómirin jaqsartýǵa óz úlesin qosýǵa qabiletti ekenin, ári halyqtyń áleýmettik osal toptaryn qoldaýda ujymdyq kúshtiń mańyzdylyǵyn aıtty. «Qaıyrymdylyq jasasań qaıyryn óziń kóresiń» demekshi, ótken jyly 80 749 azamatqa jalpy somasy 39 mıllıard teńgeden astam qaıyrymdylyq kómek kórsetildi. Bul kómektiń negizgi baǵyttary turǵyn úımen qamtamasyz etý, sport alańdaryn salý jáne densaýlyq saqtaý ınfraqurylymyn jaqsartý boldy. Taǵdyr tálkegine túsken jandardyń basynan ótip jatqan ártúrli jaǵdaılar bar. Olarǵa kómek jasap jatqan júregi keń, joqqa bere alatyn jomart jandardyń atqaryp jatqan eńbegi zor árıne. Aǵymdaǵy jyly qaıyrymdylyq salasy boıynsha qurmetti ataqqa 148 ótinish túsken. Onyń ishinde 27-i - qaıyrymdylyq uıymdardan, 27-i - metsenattardan, 58-i - jeke qaıyrymdy jandardan jáne 36-sy - eriktilerden. Nátıjesinde Qazaqstannyń ár óńiriniń atynan shyqqan metsenattardyń ishinde 19 laýreatqa qurmetti ataq berildi.

Forým barysynda paneldik sessııalar ótti.