Qazaqstanda bos jer telimderi arnaıy portalda jarııalanady

ASTANA. QazAqparat - Úkimet pen «Nur Otan» partııasy arnaıy geoaqparattyq portaldy ázirlep jatyr. Birneshe aıdyń ishinde jańa júıe xalyqqa tanystyrylýy múmkin, dep xabarlaıdy QazAqparat tilshisi.

«Nur Otan» partııasy tóraǵasynyń birinshi orynbasary Máýlen Áshimbaevtyń aıtýynsha, qazirgi kezde geoaqparattyq júıeni ázirleý sharalary atqarylyp keledi. Atalǵan jumysqa partııa mamandary da atsalysýda. «Bul júıede bos jer telimderi týraly aqparat ashyq jarııalanady. Ákimdikter arqyly jalǵa beriletin, satylatyn jerler bolsa, barlyǵy aqparattyq júıede kórsetilýi shart. Ashyǵyn aıtý kerek, dál osy salada jemqorlyq kóp. Óıtkeni aqparat ashyq túrde jarııalanbaıdy. Jer telimderi týraly aqparattyń bári jabyq. Sondyqtan jańa portal arqyly jer telimderi týraly tolyq aqparat jarııalaımyz degen oıymyz bar. Aýktsıondar, kommýnıkatsııalar, jerdiń baǵasy - bári-bári jańa júıeniń ishinde bolady», - dedi M.Áshimbaev NurOtan Trends alańynda.

Onyń aıtýynsha, geoaqparattyq portalda aýktsıonǵa qatysý fýnktsııasy da bolady. Kez kelgen adam elektrondy formatta ótinim berip, aýktsıonǵa qatysa alady. Sóıtip, jerdi jalǵa nemese jeke menshikke alýǵa múmkindik bar.

«Qazirgi kezde biz Úkimetpen tyǵyz jumys jasap jatyrmyz. Osy jumysqa Premer-Mınıstrdiń orynbasary Asqar Jumaǵalıev jaýapty. Menińshe, aldaǵy birneshe aıdyń ishinde naqty bir nátıjelerdi kórsetýge tyrysamyz», - dep atap kórsetti M.Áshimbaev.