Qazaqstanda bólshek saýda kólemi 4,4% ósti

ASTANA. QazAqparat - Qazaqstanda 2019 jyldyń qańtarynda bólshek saýda kólemi 2018 jyldyń qańtaryna qaraǵanda 4,4% ósip, 694,6 mlrd teńgeni qurady, dep habarlaıdy QazAqparat tilshisi QR Ulttyq ekonomıka mınıstrliginiń Statıstıka komıtetine silteme jasap.

Esepti kezeńde kásiporyndar satatyn taýarlardyń bólshek saýdadaǵy kólemi 4,1%, jeke kásipkerlerdiń, sonyń ishinde bazarda saýda-sattyq jasaıtyn kásipkerlerdiń saýdasy 4,8% ósken.

Jalpy bólshek saýdadaǵy azyq-túlik taýarlarynyń úlesi - 31,3%. Al azyq-túlikke jatpaıtyn taýarlar úlesi - 68,7%. Soǵan qaramastan, azyq-túlik taýarlarynyń ótkizilý kólemi 2018 jyldyń qańtarymen salystyrǵanda 5,7%, al azyq-túlikke jatpaıtyn taýarlar 3,8% kóbeıdi.

Bıyl 1 aqpanda saýda kásiporyndarynyń (esep bergen kásiporyndar boıynsha) bólshek saýda boıynsha taýar qorynyń kólemi 509,5 mlrd teńgeni quraǵan, saýda kúnderi - 63 kún.

2019 jyldyń qańtar aıynda kóterme saýda kólemi 1 503,1 mlrd teńgeni qurady. Bul ótken jyldyń sáıkes kezeńindegi deńgeımen salystyrǵanda 9,6% artyq. Kóterme taýar aınalymy qurylymynda azyq-túlikke jatpaıtyn taýarlar men óndiristik-tehnıkalyq maqsattaǵy ónimder basymdyqqa ıe bolyp otyr. Olardyń jalpy úlesi 77,7% qurady.