Qazaqstanda biliksiz ınvestorlardy qorǵaý tetigi engizilmek

<p>ASTANA. KAZINFORM &mdash; Qazaqstan Respýblıkasynyń Qarjy naryǵyn retteý jáne damytý agenttigi Dúnıejúzilik Bankpen, Halyqaralyq qarjy korporatsııasymen (IFC) jáne qarjy naryǵynyń jetekshi sarapshylarymen birlesip, ujymdyq ınvestıtsııalar naryǵyn damytý maqsatynda &laquo;Investıtsııalyq qorlar týraly&raquo; jańa zań jobasyn ázirlep jatyr. Bul týraly agenttiktiń Syrtqy&nbsp;kommýnıkatsııalar Basqarmasy málimdedi.&nbsp;</p>

Zań jobasy ishki jáne sheteldik ınvestıtsııalar tartý jaǵdaılaryn jaqsartýǵa, biliksiz ınvestorlardyń múddelerin qorǵaýdy kúsheıtýge jáne ınvestıtsııalyq qorlardyń ashyqtyǵyn arttyrýǵa baǵyttalǵan.

Zań jobasy birneshe negizgi jańalyqty usynady:

• Birinshi. Aktıvterdiń quramyna qaraı qorlardyń jańa jiktemesin engizý. Zań jobasyna sáıkes qorlar eki sanatqa bólinedi: baǵaly qaǵazdarǵa ınvestıtsııalaý qorlary jáne balamaly ınvestıtsııalaý qorlary. Jańa jikteme úzdik halyqaralyq tájirıbege sáıkes keledi jáne ınvestorlardy óz ınvestıtsııalarynyń ótimdiligi men kiristiligin ártaraptandyrýdyń, basqarýdyń tıisti tetikterimen qamtamasyz etýge múmkindik beredi.

 

• Ekinshi. Jaýapkershiligi shekteýli seriktestikti, senim seriktestigi men qarapaıym seriktestikti qosa alǵanda, ártúrli uıymdyq nysandarda qorlar qurý múmkindigin keńeıtý. Qazirgi ýaqytta qoldanystaǵy zańnama ınvestıtsııalyq qorlardy tek eki — aktsıonerlik jáne paı nysanynda qurýǵa múmkindik beredi.

 

• Úshinshi. Biliksiz ınvestorlardy qorǵaý tetigin engizý. Jańa zańda joǵary táýekeldi qorlarǵa, atap aıtqanda balamaly ınvestıtsııalaý qorlaryna ınvestıtsııa salýdy shekteýmen baılanysty biliksiz ınvestorlardy qorǵaýdyń tıisti tetikteri kózdeletin bolady.

 

• Tórtinshi. Balamaly ınvestıtsııalaý qorlarynyń transparenttiligin arttyrý. Zańnamalyq bastamalar ashyqtyqty qamtamasyz etýge jáne aqparattyń qoljetimdiligin arttyrýǵa baǵyttalǵan. Balamaly ınvestıtsııalaý qorlaryn tirkeýdi engizý josparlanyp otyr, bul retteýshilik talaptar men aqparatty jarııa etý qaǵıdalarynyń saqtalýyn baqylaýdy qamtamasyz etýge múmkindik beredi. Nátıjesinde bul ujymdyq ınvestıtsııalar naryǵynda neǵurlym ashyq jáne qaýipsiz orta qurý arqyly ınvestorlardyń múddelerin senimdi qorǵaýdy qamtamasyz etýge múmkindik beredi.

Zań jobasyn ázirleý kezinde ınvestıtsııalyq jáne venchýrlik qorlardyń qyzmetin retteýdiń úzdik halyqaralyq tájirıbesi, onyń ishinde Eýropalyq Odaq elderinde, AQSh jáne Ulybrıtanııada paıdalanylatyn UCITS (Undertakings for Collective Investment in Transferable Securities) jáne AIF (Alternative Investment Funds) qorlarynyń tujyrymdamasy paıdalanyldy.

Jańa zańnyń engizilýi jańa qatysýshylardy tartý, ınvestıtsııalyq qorlardyń qarjy quraldaryn shyǵarý kezinde ıkemdilikti qamtamasyz etý, sheteldik ınvestorlar úshin túsinikti retteý ortasyn qurý esebinen ujymdyq ınvestıtsııalar naryǵyn damytýǵa yqpal etedi dep kútilýde.

Zań 2025 jyly qabyldanady dep kútiledi.