Qazaqstanda «Bızneske arnalǵan úkimettiń» 200 ofısi ashylady

NUR-SULTAN. QazAqparat - Búgin QR Ulttyq ekonomıka mınıstri Rýslan Dálenov Nur-Sultan qalasynda «Bızneske arnalǵan úkimet» jobasyn iske asyrý boıynsha kóshpeli jumys keńesin ótkizdi. Bızneske arnalǵan alań «iQala» qalalyq qyzmet ortalyǵy bazasynda ornalasqan, dep habarlaıdy QazAqparat mınıstrliktiń baspasóz qyzmetine silteme jasap.

Jobanyń maqsaty – ortalyqtandyrylǵan barlyq memlekettik qoldaý sharalary men «biryńǵaı tereze» qaǵıdaty boıynsha memlekettik qyzmet kórsetý.

Aıta keteıik, Memleket basshysynyń Úkimettiń keńeıtilgen otyrysynda bergen tapsyrmalaryn iske asyrýda bıznes-klımatty jaqsartý, «Bızneske arnalǵan úkimet» qyzmetin iske qosý, sondaı-aq aqyldy retteý quralyn iske asyrý reformasynyń 8-paketin qabyldaý qajet.

«Azamattarǵa arnalǵan úkimet» qyzmetin iske qosý jobasyn oryndaý úshin Ulttyq ekonomıka mınıstrliginde múddeli memlekettik organdarmen, «Atameken» UKP jáne memlekettik qoldaý sharalary operatorlarymen birge jobalaý toby quryldy.

«Bızneske arnalǵan úkimet» qyzmeti – qarjylandyrý, satý, tsıfrlyq qyzmet, quqyqtyq súıemeldeý men quzyret tárizdi suranysqa ıe bıznes-saýaldardyń birikken jeri. Biz kásipkerler úshin biryńǵaı hab quryp otyrmyz. Al bul kásipkerlikke de, jalpy el ekonomıkasyna da qolaıly áser etpek», - dedi mınıstr.

Bul - memleket pen bıznestiń biryńǵaı qyzmet kórsetý qaǵıdaty boıynsha ózara is-qımyl formaty. «Bızneske arnalǵan úkimet» biryńǵaı ofısinde kásipkerler óz bıznesin damytý, quzyretin artyrý men qarjylandyrý máselesi boıynsha barlyq qyzmetter men konsýltatsııa ala alady.

Dálenovtiń aıtýynsha, qazirgi jumys isteıtin ortalyqtardan kóp aıyrmashylyq bar. Búginde ortalyqtar kásipkerlerge konsýltatsııa bergenmen, olar memlekettik organdarǵa, ákimdikke, bankke, salyq oryndaryna taǵy da júginýge májbúr. Endi aqparattyq júıe arqyly e-gov, ortalyq organdar men ákimdikterdiń qyzmetin qosýǵa bolady. Bir jaqqa barýdyń qajeti joq. Ýaqyt qana únemdelmeıdi. Júıeden ótinish-qujattyń qaı jerde jáne ne úshin «turyp qalǵanyn» kórýge bolady. Bul degenimiz - bıznesti qorǵaý.

«Endi bıznesmender týyndaǵan másele qandaı kúrdeli bolsa da, qaıda, kimge baryp, jolyǵyp, jaýap alýǵa bolatynyn naqty biletin bolady», - dedi Dálenov.

Pılottyq joba eki aı ishinde astana men 4 oblys ortalyǵynda ótkiziledi. «Azamattarǵa arnalǵan úkimet» qyzmetin tolyq iske qosý bıylǵy maýsymǵa belgilenip otyr.