Qazaqstanda bıyl taǵy 55 eldi mekenge gaz tartylady

ASTANA. QazAqparat – Bıyl taǵy 55 eldi meken gazben qamtylady. Bul týraly búgin Úkimet otyrysynda Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Gazdandyrýdyń bas shemasyn qarjylandyrý bıýdjet qarajaty, gaz jáne gazben jabdyqtaý salasyndaǵy ulttyq operator – QazaqGaz kirisi jáne Qazaqstan Respýblıkasynyń zańnamasynda tyıym salynbaǵan ózge de qarjy kózderi esebinen júzege asyrylady. Jobalardy bıýdjetten qarjylandyrýdyń ulǵaıýy gazben jabdyqtaý deńgeıin 11 paıyzǵa nemese 2018 jyldan bastap qosymsha 2,6 mln adamnyń gazǵa qol jetkizýine múmkindik berdi», - dedi ol.

Mınıstrdiń dereginshe, bıyl 76 jobany iske asyrýǵa 73,9 mlrd teńge qarastyrylǵan.

«Bul 160 myń turǵyny bar 55 eldi mekendi gazben qamtamasyz etýge múmkindik beredi. 2023 jyldyń sońynda el boıynsha gazben jabdyqtaý 60 paıyz deńgeıinde kútilip otyr», - dedi Bolat Aqsholaqov.