Qazaqstanda bıyl 600 shaqyrymǵa jýyq jol jóndeledi

NUR-SULTAN. QazAqparat – Qazaqstanda joldardy jóndeý jumystary jalǵasýda. Bıyl elimizdiń bes óńirinde respýblıkalyq mańyzy bar avtomobıl joldarynyń 585 shaqyrymyna kúrdeli jóndeý júrgizilmek.

Bul týraly QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap habarlaıdy.

Osylaısha, Batys Qazaqstan oblysynda kúrdeli jóndeýmen 248 shaqyrym jol qamtylǵan: «Qaztalovka-Jánibek-Reseı shekarasy» jáne «Ónege-Bısen-Saıqyn». Almaty oblasynda jumystar «Almaty – Bishkek» (Altyn Orda) jáne «Kókpek – Kegen – Qyrǵyzstan shekarasy» avtomobıl joldarynda júrgizilýde.

Sondaı-aq, jol salasy qyzmetkerleri kúrdeli jóndeýdi Qostanaı oblysyndaǵy «Jezqazǵan – Petropavl» men «Reseı shekarasy - (Ekaterınbýrgke) – Almaty» tas joldarynda júrgizýde. Pavlodar oblysynda «Qalqaman – Baıanaýyl – Úmitker – Ýlıanovsk» jáne «Lenın – Aqsý – Kóktobe – Kýrchatov» jol ýchaskeleri jóndeý jumystarymen qamtylǵan. Budan bólek, bıyl Soltústik Qazaqstandaǵy «Býlaevo-Vozvyshenka-Molodogvardeıskoe-Kırovo-Qııaly-Roşınskoe» joly jóndelmek.

Aıta ketý kerek, kúrdeli jóndeý joldyń barlyq komponentterine uzaq qashyqtyqta áser etedi. Ol topyraqty nyǵaıtýǵa, aqaýlardy joıýǵa, drenaj júıesin retke keltirýge jáne jabyndy jóndeýge múmkindik beredi. Jalpy, jyldyń qorytyndysy boıynsha kúrdeli jóndeýden keıin 62 shaqyrym respýblıkalyq jol paıdalanýǵa berý kózdelip otyr.