Qazaqstanda bitistirýshildik pen dıalog ornatýda úlken dástúr bar - Gýterrısh
Q.Toqaev portýgal saıasatkerin BUU basshysy laýazymyna saılanýymen quttyqtady jáne tájirıbeli dıplomat, saıasatker ári basqarýshy retinde onyń Uıymǵa qosymsha serpin beretinine senim bildirdi. Senat Tóraǵasy A.Gýterrıshtiń shtab-páteri Jenevada ornalasqan BUU Bosqyndar jónindegi Joǵarǵy komıssary laýazymyndaǵy tıimdi qyzmetin atap ótti. Q.Toqaevtyń pikirinshe, A.Gýterrısh bosqyndar sany adam aıtqysyz (60 mıllıonǵa deıin) ulǵaıýyna ákelip soqqan halyqaralyq daǵdarystar men qaqtyǵystardyń barlyq qaterine tabysty túrde qarsy turdy.
Q.Toqaev Qazaqstan dıplomatııasy BUU Qaýipsizdik keńesiniń turaqty emes múshesiniń kúrdeli mıssııasyn abyroımen atqarady dep senedi. BUU Qaýipsizdik Keńesindegi bizdiń elimizdiń qyzmeti beıbitshilikti qamtamasyz etý, ornyqty damý jáne adam quqyqtaryn qorǵaý jolyndaǵy osy jahandyq uıymnyń áleýetin nyǵaıtýǵa yqpal etedi. Qazaqstan terrormen kúres, qaqtyǵystardy retteý, ornyqty damýdy qamtamasyz etý jáne qazirgi zamandaǵy kóptegen máselelerdi BUU júıesiniń úılesimdi jumysyn jáne barlyq múshe memleketterdiń birlesken kúsh-jigerin talap etedi. Sondyqtan bizdiń elimiz BUU-nyń jańa Bas Hatshysy A.Gýterrıshtiń qyzmetin qoldaıtyn bolady.
Bas Hatshysy laýazymyna kiriser qarsańynda A.Gýterrısh BUU Qaýipsizdik Keńesine turaqty múshe bes eldiń astanalaryna jáne Astanaǵa saparlap otyr. «Qazaqstan BUU Qaýipsizdik Keńesiniń taǵy bir jaı turaqty emes múshesi bolyp qana qoımaıtyny anyq. Sizdiń elińizdiń bitistirýshildik pen dıalog ornatýda úlken dástúri bar. Qazaqstan halyqaralyq arenada yntymaq kópirin ornatýda mańyzdy ról atqarady. Búginde álemdegi iri elderde, sondaı-aq, aımaqtyq derjavalar arasynda biri-birine ózara senimsizdik basym bolyp turǵan kezde, bul Birikken Ulttar Uıymy úshin erekshe mánge ıe, - dep atap ótti A.Gýterrısh.
Jańa saılanǵan Birikken Ulttar Uıymynyń Bas hatshysynyń aıtýynsha, Qazaqstan halyqaralyq shıelenisti azaıtýda jáne qajetti sheshimderge qol jetkizýde kómektese alady. A.Gýterrısh Qazaqstan men Birikken Ulttar Uıymynyń birlesken is-qımylynyń negizgi baǵyttary qarýsyzdaný, lańkestikke qarsy kúres, dinder arasyndaǵy dıalog, ekonomıkalyq damý, taǵy basqa da máseleler bolýy tıis dep sanaıdy. Sondyqtan, Astanaǵa sapary aıasynda jańa Bas hatshy Qazaqstanmen yntymaqtastyqtyń jumys alańyn qurýǵa nıetti.