Qazaqstanda bitimgershilikke arnalǵan tehnologııa salasyndaǵy BUU sımpozıýmy ótedi

NUR-SULTAN. QazAqparat - 28-31 mamyrda Nur-Sultan qalasynda bitimgershilikke arnalǵan tehnologııa salasyndaǵy áriptestik boıynsha BUU-nyń sımpozıýmy ótedi. Bul jóninde Nıý-Iorktegi BUU janyndaǵy Qazaqstannyń Turaqty ókili Qaırat Omarov BUU Qaýipsizdik Keńesiniń bitimgershilik taqyrybynda ótken ashyq pikirtalasynda málim etti, dep habarlaıdy QR SІM baspasóz qyzmeti.

Qazaqstannyń Elshisi aldaǵy bolatyn sımpozıým bitimgershilik operatsııalarynyń tıimdiligin arttyrý joldaryn izdestirý baǵytynda memleketter, ǵylymı jáne halyqaralyq uıymdar arasyndaǵy ózara árekettestiktiń alańyna aınalatynyn atap ótti. Іs-sharanyń basty taqyryptary bitimgerlerdiń qaýipsizdigin arttyrý, kommýnıkatsııalardy kúsheıtý, ahýaldyq jaǵdaı jóninde habardar bolýdy jaqsartý, qoldan jasalǵan jarylǵysh qurylǵylarǵa qarsy turý, telemedıtsınany engizý jáne qorshaǵan ortaǵa yqpal etýdi azaıtý maqsatyndaǵy tehnologııalyq ınnovatsııalar bolmaq.

Qazaqstan astanasynda ótetin aldaǵy sımpozıým Ortalyq Azııada tuńǵysh ret ótkiziledi. Onda Qazaqstan Respýblıkasynyn Qorǵanys mınıstriniń shaqyrýymen BUU Bas Hatshysynyń operatıvtik qoldaý boıynsha orynbasary Atýl Hare jáne bitimgershilik operatsııalary boıynsha orynbasary Jan-Per Lakrýa qatysady. Buǵan deıin mundaı BUU is-sharalary damyǵan elderde, atap aıtqanda Germanııa, Avstrııa, Italııa jáne Ońtústik Koreıada ótkizilip kelgen.

Sımpozıýmdy Qazaqstanda ótkizý BUU-nyń múshe-memleketter qorǵanys vedomstvolarynyń ókilderin otandyq qorǵanys ónerkásibi ónimderiniń úlgilerimen tanystyrýǵa múmkindik beredi jáne bul ónimder qazirdiń ózinde BUU bitimgershilik mıssııalaryna kontıngentterin jiberýshi memleketterdiń arasynda qyzyǵýshylyq týdyryp otyrady. Jekelegen bitimgershilik operatsııalar júrgizilip jatqan qıyn jaǵdaılardaǵy qaqtyǵystarda otandyq «Barys» bronetehnıkasy men «Arlan» mınalarǵa qarsy korǵaýy bar kólikter sııaqty otandyq áskerı tehnıka suranysqa ıe bolýda. Sondaı-aq, BUU mıssııalaryna arnalǵan birqatar qazaqstandyq tehnologııalyq jobalar da talqylanbaq.

BUU Qaýipsizdik Keńesiniń ashyq pikirtalasynda Q.Omarov Qazaqstannyń bitimgerlerdi daıarlaýǵa jáne ulttyq bitimgerlik áleýetin damytýǵa úlken kóńil bóletinin atap ótti. Sonymen qatar, Elshi BUU-nyń osy jyldyń basynda «Beıbitshilik úshin seriktestik» atty qazaqstandyq oqý ortalyǵynyń (KAZTsENT) bitimgershilik kýrstaryn sertıfıkattap, olardan endi álemniń kez-kelgen memleketiniń áskerı qyzmetkerleri óte alatynyn da eske saldy.

2018 jyldyń qazan aıynda Qazaqstan alǵash ret Lıvandaǵy BUU-nyń ýaqytsha kúshterine Úndi batalonymen birge 120 áskerı qyzmetshi bitimgershilik rotasyn jiberdi. Qazirgi ýaqytta BUU-nyń Batys Sahara boıynsha referendým ótkizý jónindegi mıssııasynda eki qazaqstandyq áıel-ofıtser áskerı baqylaýshy retinde qyzmet atqarýda.