Qazaqstanda bırja bottaryna tyıym salynbaq
Búgin palatanyń jalpy otyrysynda depýtat Sergeı Ponomarev taýar bırjalary máselelerine arnalǵan zań jobasyn talqylaý kezinde bırjadaǵy mámilelerdi bekitýge bottar da aralasyp jatatynyn, bul júıe avtomattandyrylǵan algorıtmge jatatynyn aıtty.
«Olardyń ónimdiligi birneshe ese joǵary jáne sharttardy bekitýde ádettegi brokerlerden ozyp, birneshe sekýndta aıaqtap jatady. Bul jaǵdaı básekeni buzady, óıtkeni eshbir broker osylaısha tez áreket ete almaıdy», - dedi S.Ponomarev.
Óz kezeginde E.Smyshlıaeva bottar jasaıtyn operatsııalardy qabyldamaý týraly norma engizilip jatqanyn aıtty.
«Eger krıptobırjalarda nemese qor naryqtarynda bul protseske sáıkes keletin algorıtmder retinde sanalsa, al taýar bırjalarynda bottar saýda-sattyqqa kúdikpen qaraýǵa ákeledi. Sebebi olar saýdaǵa manıpýlıatsııa jasaýǵa, baǵanyń kúrt ózgerýine áser etýi múmkin. Bul jaǵdaı tehnologııany engizýdiń janama áserleri sanalady. Sondyqtan biz mınýtyna eki nemese odan da kóp operatsııa jasaıtyn bottardy paıdalanýǵa tyıym salýdy engizemiz. Mundaı bottar anyqtalǵan sharttar nazarǵa alynbaıdy. Osydan keıin bırja oıynshylary bul bottardy paıdalanýdyń esh mańyzy joq ekenin túsinedi. Bul tásil ınnovatsııa men qaýipsizdik arasyndaǵy teńgerimdi ornatady», - dedi Ekaterına Smyshlıaeva.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine taýar bırjalary máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.