Qazaqstanda Biryńǵaı zańgerler tizilimin qurý usynyldy
Basqosýda úkimettik emes uıymdar, zańgerlik kompanııalar, bıznes qaýymdastyqtar, óńirlik advokattar alqasy, keńse palatasy men baǵalaýshylar palatasy ókilderi biryńǵaı zańgerler tizilimin qurý qajettiligi máselesin talqylady.
QR Ádilet mınıstrligi Tirkeý komıteti jáne quqyqtyq kómek kórsetý komıteti tóraǵasynyń orynbasary Almat Raqyshevtiń aıtýynsha, advokattyqty qosa alǵanda, kásibı zańgerlik qyzmet «qandaı jaǵdaı bolsa da» shekteýge jatpaıtyn bilikti zańgerlik kómek kórsetýge konstıtýtsııalyq kepildi quqyqpen baılanysty. «Halyqqa kórsetilip otyrǵan zańgerlik qyzmettiń sapasy ózekti problemaǵa aınalyp otyr. Zańgerdiń sapaly zańgerlik bilimi ári tıisti salada tájirıbesi bolmasa, kásibı maman bolyp sanalmaıdy», - dedi Almat Raqyshev.
«Senimhat boıynsha ókilge erekshe talaptar protsessýaldyq zańda kózdelmegen. Ókil degen uǵym kóp jaǵdaılarda, zańgerlik te, qandaı da ózge joǵary bilim degen mártebege ıe emes, quqyq salasyndaǵy praktıkalyq tájirıbesi men teorııalyq bilimi bolmaıdy, moraldyq-etıkalyq qaǵıdalarǵa negizdelmegen, tipti sottylyǵy bolýy múmkin», -dep atap ótti komıtet tóraǵasynyń orynbasary.
Onyń pikirinshe, kásibı zańgerlik qyzmetti advokattar men kommertsııalyq zańgerler qyzmetine bólgen durys jáne músheligi azamattyq ister boıynsha sottarda múddelerin bildirý úshin negiz bolatyn Biryńǵaı zańgerler tizilimin qurý týraly máseleni pysyqtaý kerek. Bul sharalardyń Dúnıejúzilik saýda uıymynyń talaptaryn esepke alyp, zańgerlik qyzmet kórsetý júıesin damytýdyń ulttyq modelin qalyptastyrýǵa septigi tııýi qajet.
Sondaı-aq forýmda zańgerlik qyzmet naryǵyndaǵy jumystardy ońtaılandyrýdyń ózekti máseleleri talqylandy. Atap aıtqanda, «Qazbar» qoǵamdyq birlestiginiń ókili Aıgúl Kenjebaeva zańgerlerdiń jańa etıka kodeksin qabyldaýdy jáne zańgerlik qyzmet naryǵynda qoldaný úshin qatań qaǵıdany birizdendirý máselelerin usyndy. Dóńgelek ústel qorytyndysy boıynsha talqylanǵan máseleler jóninde usynymdar saralandy.