Qazaqstanda birinshi toqsanda 503 myńnan astam adam áleýmettik kómek aldy

NUR-SULTAN. QazAqparat - Bıylǵy qańtar-naýryz aralyǵynda 98,1 myń otbasyndaǵy 503,5 myń adam ataýly áleýmettik kómek aldy. Bul maqsatqa bıýdjetten 87,1 mlrd teńge bólindi, dep habarlady QazAqparat.

Eńbek jáne halyqty áleýmettik qorǵaý mınıstrliginiń habarlaýynsha, mundaı kómek otbasynyń jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa taǵaıyndalady. Budan basqa, osy kómekti kórsetýdiń jańa tetigin iske asyrý aıasynda elimizdiń barlyq óńirinde tabysy az otbasylardyń mektep jasyna deıingi balalaryn kepildik berilgen áleýmettik toptamamen qamtamasyz etý boıynsha jumys júrgizilýde.

«Aǵymdaǵy jylǵy birinshi toqsanda ataýly áleýmettik kómek alýshylar qataryndaǵy 1 jastan 6 jasqa deıingi 124,5 myń bala azyq-túlik jáne turmystyq hımııa jıyntyǵy túrinde toptama aldy», - dep málimdedi vedomstvo.

Eske sala keteıik, aǵymdaǵy jyldyń qańtar aıynda tótenshe jaǵdaı rejımine baılanysty ótken jyldyń sońynda AÁK alǵan azamattarǵa tólemder kelesi toqsanǵa avtomatty túrde uzartyldy. Bul rette jańa alýshylar úshin Elektrondyq úkimet portaly arqyly ótinish berý múmkindigi iske asyryldy. Qazirgi de qazaqstandyqtar bul kómekti alýǵa turǵylyqty jerindegi jumyspen qamtý ortalyǵynda, sondaı-aq egov.kz portaly arqyly ótinish bere alady.