Qazaqstanda birikken MMA federatsııasy quryldy
Naqtyraq aıtqanda, Qazaqstannyń aralas jekpe-jek MMA federatsııasy, Aralas jekpe-jek, pankratıon jáne greplıng Ulttyq federatsııasy, NOMAD MMA federatsııasy bir birlestikke - «Qazaqstan MMA federatsııasyna» birigip otyr.
«Ózderińiz biletindeı, biz Qazaqstannyń jaýyngerlik óner qaýymdastyǵyn quryp, onyń basshylyǵyna Kárim Qajymqanuly (Másimov - avt.) kelgen bolatyn. 2022 jyly «SportAccord» halyqaralyq konventsııasy aıasynda birikken oıyn ótkizý mindeti tur. Muny júzege asyrý úshin bizge jekpe-jek óneri salasyndaǵy ǵana emes, barlyq is-áreketterdi júıeleý qajet. Qazirgi tańda biz ulttyq sport túrlerindegi kúshimizdi nyǵaıtýdamyz. Shyn mánisinde, mınıstrlik tarapynan olımpıadalyq sport túrlerine kóbirek kóńil bólinip, jekpe-jek kúres túrlerine jetkilikti nazar aýdarylmaı qalǵan bolatyn. Biraq endigi kezekti biz syndarly túrde alǵa jyljýymyz kerek. MMA-nyń joǵary jetistikterge ıe ekendigin aıta kele jańa maqsattarǵa umtylýymyz kerek», - dedi QR Mádenıet jáne sport mınıstri Arystanbek Muhamedıuly mınıstrlikte ótken otyrysta.
Mınıstr óz sózinde taraptar Ǵalymjan Esenovti birikken MMA federatsııasynyń basshysy laýazymyna maquldaǵanyn aıtyp ótti.
«Ol tanymal adam. Qazirgi ýaqytta ol «Almaty marafony» iri sporttyq is-sharanyń uıymdastyrýshysy, kóptegen jyldar boıy shahmat federatsııasyn basqardy. Aıta ketý kerek, shahmatta, ásirese bizdiń qyzdarymyz álemdik reıtıngte jetekshi oryndarǵa ıe. Bul nátıjelerdi biz tipti elestete de almaǵan edik. Ǵalymjan Esenov - Kárim Másimov basqaratyn Qazaqstan trıatlon federatsııasynyń vıtse-prezıdenti. Bizdiń usynysymyzdy qoldaǵany úshin oǵan alǵys aıtqym keledi. Sebebi biz júıeli túrde alǵa júrýimiz kerek. Onyń zańgerlik, uıymdastyrýshylyq tájirıbesi bar», - dedi Arystanbek Muhamedıuly.