Qazaqstanda bir jylda 117 myńǵa jýyq zańdy tulǵa tirkelgen

NUR-SULTAN. QazAqparat - 1 shildede zańdy tulǵalardy memlekettik tirkeý fýnktsııasy Ádilet mınıstrliginen «Azamattarǵa arnalǵan úkimetke» berilgenine týra bir jyl tolady. Osy ýaqyt ishinde Memlekettik korporatsııa 116 997 zańdy tulǵany, fılıaldar men ókildikterdi tirkedi, dep habarlaıdy QazAqparat vedomstvonyń baspasóz qyzmetine silteme jasap.

Azamattarǵa arnalǵan úkimetke 7 uıymdyq-quqyqtyq nysan berilgen. Kommertsııalyq emes uıymdardy tirkeý Ádilet mınıstrliginiń quzyrynda qaldy.

Shaǵyn bızneske qatysty zańdy tulǵalardy bastapqy tirkeý tirkeýmen aınalysatyn organynyń qatysýynsyz elektrondyq formatta egov.kz elektrondyq úkimet portalynda júzege asyrylady. Sondyqtan, statıstıkalyq esepte tirkelgen JShS sany joq.

Zańdy tulǵalardy tirkeý boıynsha eń kóp qyzmet Almaty qalasynda kórsetilgen - 33 myńnan astam zańdy tulǵa tirkelgen. Ekinshi orynda - Nur-Sultan. Munda bir jyl ishinde 24 myńnan astam tirkeldi. Úshinshi orynda - Qaraǵandy oblysy. Zańdy tulǵalardy tirkeý jelisi boıynsha 7 myńnan astam qyzmet kórsetilgen. Bul qyzmet Jambyl, Qyzylorda jáne Soltústik Qazaqstan oblystarynda eń az suranysqa ıe.

Kommertsııalyq zańdy tulǵalardy tirkeý salasynda memlekettik qyzmet kórsetýden basqa, memlekettik korporatsııa olardy ońtaılandyrý boıynsha belsendi jumys júrgizýde.

Máselen, «Azamattarǵa arnalǵan úkimet» bastamasymen «Memlekettik qyzmet kórsetý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań tolyqtyryldy.

Atap aıtqanda, jarǵynyń telnusqasyn berý merzimi úsh jumys kúninen bir kúnge deıin, bıznesti qospaǵanda, zańdy tulǵalarǵa, fılıaldar men ókildikterge qatysty tirkeý rásimderin júzege asyrý merzimi on jumys kúninen beske deıin qysqartyldy.

Sondaı-aq, basshynyń, qyzmettiń negizgi túriniń jáne basqalardyń ózgerýi sııaqty zańdy tulǵalardyń derekterin ózgertýdi avtomattandyrý máselesi pysyqtalýda.