Qazaqstanda bir jyl ishinde benzın baǵasy qanshalyqty arzandady - zertteý

NUR-SULTAN. QazAqparat - Qazaqstanda benzın baǵasynyń arzandaǵany baıqalady. Degenmen, jazǵy dızel otyny 16, al qysqy dızel otyny 23 paıyzǵa aıtarlyqtaı qymbattaı túsken, dep habarlaıdy QazAqparat tilshisi Ranking.kz saıtyna silteme jasap.

Qazaqstanda benzınniń bólshek saýdadaǵy ortasha baǵasy birshama tómendegen. 2019 jyldyń sáýir aıynyń qorytyndysynda AI-92 markaly benzın baǵasy bir jyl ishinde 8 paıyzǵa arzandap, 1 lıtrine 148,3 teńge boldy. Al AI-95/96 benzıniniń lıtri 168,8 teńgege deıin (5,3 paıyzǵa), AI-98 benzıni 186,9 teńgege deıin (3 paıyzǵa) arzandady.

Dızel otyny kerisinshe bir jyldyń ishinde aıtarlyqtaı qymbattady. Máselen, qysqy dızel 23 paıyzǵa kóterilip, lıtri 259,3 teńgege jetse, baǵasy 16,3 paıyzǵa kóterilgen jazǵy dızeldiń bir lıtri 191,8 teńge boldy.

Avtojanarmaı quıý stansalarynyń (3805), avtogaz quıý stansalarynyń (1480), avtogaz toltyrý kompressorlyq stansalarynyń (11) jalpy sany ótken jyldyń basynda 5296 birlikke jetip, bir jyl burynǵy kórsetkishten 4,8 paıyzǵa artty.

2017 jyldyń ishinde atalǵan stansalardaǵy munaı ónimderiniń bólshek saýda kólemi aqshaǵa shaqqanda 886,8 mlrd teńgeni qurady. Bul bir jyl burynǵy kórsetkishten 21,3 paıyzǵa artyq. Onyń ishinde 601,2 mlrd teńgege benzın, 233,5 mlrd teńgege dızel otyny, 52,1 mlrd teńgege propan men býtan jáne 5,7 mln teńgege syǵylǵan tabıǵı gaz satyldy.