Qazaqstanda bir aılyq is-shara kezinde kıik sany naqtylanady

ORAL. QazAqparat – Qazaqstanda 15 sáýir – 15 mamyr aralyǵynda «Kıik» keń aýqymdy tabıǵat qorǵaý is-sharasy ótkiziledi, dep habarlaıdy QazAqparat tilshisi.

BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń Óńirlik kommýnıkatsııalar qyzmeti alańynda ótken brıfıngte málim etkenindeı, osy maqsatta «Ohotzooprom» ÓB» RMQK, tabıǵat qorǵaý polıtsııasy jáne Ulttyq qaýipsizdik komıteti Shekara qyzmeti departamenti shekaralyq baqylaý basqarmasy qyzmetkerlerimen birlesip, reıdtik is-sharalardy ótkizý úshin mobıldi toptar qurady.

Onyń sózine qaraǵanda, buǵan 11 avtokólik, kıik sanaǵyn júrgizý úshin 1 tikushaq jáne jeke quramnan 50 adam jumyldyrylady. Sonymen qatar kıik meken etetin aýmaqtarda kúzet beketteri qoıylady.

Inspektsııa basshysynyń aıtýynsha, kıikterdi zańsyz aýlaý, derıvattaryn zańsyz tasymaldaý, saqtaý jáne ótkizýge baılanysty bıyl 14 qylmystyq is tirkelip, quqyq buzýshylardan 3539 kıik múıizi alyndy. Qazirgi kezde osy ister boıynsha tergeý amaldary júrgizilýde. 2022 jyly 27 qylmystyq is qozǵalyp, 548 kıik múıizi tárkilendi. Sottarmen barlyǵy 285 mln teńge óndirildi. Salystyra qaraǵanda, bıyl tárkilengen kıik múıiziniń sany áldeqaıda kóbeıip otyr.

Orman sharýashylyǵy jáne janýarlar dúnıesi komıteti tóraǵasynyń 2015 jylǵy 24 shildedegi №190 buıryǵyna sáıkes, ǵylymı maqsattarda paıdalanýdan basqa, el aýmaǵynda kıikterdi, olardyń bólikteri men derıvattaryn paıdalanýǵa 2024 jylǵa deıin tyıym salynǵan.

«Mamyr aıynda oblysqa shet elderden mamandar jáne elimizdiń belgili ǵalymdary kelip, zertteýler júrgizedi. Sonyń qorytyndysyna sáıkes kıik sanyn retteý boıynsha sheshim qabyldanady», - dedi N.Rahymjanov.

«Ohotzooprom» ÓB» RMQK bas dırektory Márlen Aınabekov keltirgen málimetke qaraǵanda, qazirgi tańda respýblıka kóleminde 1 mln 318 myń kıik bolsa, sonyń 801 myńy Oral, 28 myńy Ústirt, 489 myńy Betpaqdala popýlıatsııasyna jatady.

«Álemdegi kıiktiń 97 paıyzy Qazaqstandy mekendeıdi. Bıylǵy kıik sanaǵyna eki tikushaq, basqa da tehnıkalar qatystyrylady. Sondyqtan kıik sany jazǵa qaraı naqtylanady»,- dedi M.Aınabekov.

Eske sala keteıik, budan buryn BQO-da kıik sanynyń artýyna baılanysty sharýalardan shaǵym kóbeıip otyrǵanyn jazǵan bolatynbyz.