Qazaqstanda bir aıdyń ishinde turǵyn úı baǵasy 1,2 paıyzǵa qymbattady

NUR-SULTAN. QazAqparat – Qazaqstanda 1 aıdyń ishinde turǵyn úı baǵasy 1,2 paıyzǵa qymbattady. Bul týraly Strategııalyq josparlaý jáne reformalar agenttiginiń ulttyq statıstıka bıýrosynan málim etti, dep habarlaıdy QazAqparat tilshisi.

«Bir aıda ( maýsymnan mamyrǵa qaraǵanda) abattandyrylǵan turǵyn úıdi alyp satý baǵasy – 1,2, jańa turǵyn úıdi satý 0,9 paıyzǵa ósti. Abattandyrylǵan turǵyn úıdi jalǵa alý tólemi 0,3 paıyz joǵary boldy», - delingen bıýro tartqan aqparatta.

Al vedomstvonyń málimetinshe, 2020 jyldyń jeltoqsanymen salystyrǵanda maýsymda jańa turǵyn úıdi satý – 9,2, abattandyrylǵan turǵyn úıdi alyp satý – 14,7, abattandyrylǵan turǵyn úıdi jalǵa alý tólemi 7,4 paıyzǵa kóterilgen.

Sonymen qatar 2020 jyldyń qańtar-maýsymyna qaraǵanda osy jyldyń birinshi jartyjyldyǵynda jańa turǵyn úıler 9,6 paıyzǵa qymbattap, sharshy metri 338 450 teńgege jetti.

Al abattandyrylǵan turǵyn úıdi alyp satý quny 22,3 paıyzǵa kóterilip, sharshy metri 267 364 teńgeni, abattandyrylǵan turǵyn úıdi jalǵa alý tólemi 10,9 paıyza artyp, sharshy metri úshin 1 764 teńgeni qurady.