Qazaqstanda bıdaıdyń ımportyn shekteý máselesi pysyqtalyp jatyr
«Byltyr qolaısyz aýa raıynan zardap shekken aýyl sharýashylyǵy kásiporyndaryn qoldaý maqsatynda „Azyq-túlik korporatsııasy“ UK AQ 2023 jylǵy ónimnen 350 myń tonna kóleminde 4-shi, 5-shi surypty jáne sortsyz bıdaıdy tikeleı satyp aldy, sondaı-aq tıimdi satyp alý baǵasy belgilendi. Osy maqsatta Úkimet qaýlysymen korporatsııanyń jarǵylyq kapıtalyn tolyqtyrýǵa 31,3 mlrd teńge bólindi. Sýbsıdııaǵa qajet somany jabý boıynsha sheshim qabyldandy. Tıisti jumys Úkimet jaǵynan atqarylyp, ósimdik sharýashylyǵyn sýbsıdııalaýǵa 30 mlrd teńge jáne mal sharýashylyǵyna 30 mlrd teńge, sondaı-aq paıyzdyq mólsherleme men ınvestıtsııalyq sýbsıdııaǵa 4,3 mlrd teńge bólindi», — delingen Aýyl sharýashylyǵy mınıstrliginiń Kazinform agenttigine bergen jaýabynda.
Mınıstrlik málimetine qaraǵanda, bólingen qosymsha qarajat sharýalardyń 2024 jylǵy egis naýqanyna qajet qarjy resýrstarymen qamtamasyz etýge múmkindik beredi.
«Qazirgi kezde Korporatsııa astyqty satýǵa qatysty klastyq emes astyq pen 5-klasty bıdaıǵa satyp alýshylardy belsendi izdestirip jatyr. Qazaqstan astyǵyn satyp alýshy elderdiń (Iran, Qytaı, Ózbekstan, Ázerbaıjan jáne t. b.) barlyǵymen, el ishindegi satyp alýshylarmen (qus ósirýshiler, mal ósirýshiler, spırt zaýyttary), sondaı-aq belsendi treıderlermen kelissóz júrgizildi jáne astyqtyń sapalyq sıpattamasy boıynsha usynystar tústi. Qaıta óńdeý kásiporyndaryn qospaǵanda bıdaıdyń ımportyn shekteý máselesi pysyqtalyp jatyr. Bul mal sharýashylyǵy kásiporyndaryna klastyq emes bıdaıdy ótkizýdi qamtamasyz etýge múmkindik beredi. Jalpy, joǵaryda atalǵan máseleniń barlyǵy mınıstrliktiń turaqty baqylaýynda ekenin atap ótemiz», — dep jazylǵan vedomstvonyń aqparatynda.
Aıta keteıik, byltyr jyl aıaǵynda Parlament depýtattary Qazaqstanda fermerler sapasy tómen astyqtan shyǵynǵa batýy múmkin ekenin aıtqan edi.
Sol kezde 5,6 mln tonna tómen sanattaǵy astyqty eksporttaý máselesi 2-3 aıda sheshilýi kerek ekeni aıtyldy.