Qazaqstanda «Beıbitshilik jaýyngeri» baıqaýyna irikteý júrip jatyr

NUR-SULTAN. QazAqparat - Komandalardy 2019 jylǵy Halyqaralyq armııa oıyndaryna qatysýǵa daıarlaý úshin Qarýly Kúshter masshtabynda «Spassk» oqý polıgonynyń bazasynda «Beıbitshilik jaýyngeri» konkýrsyna qatysý úshin úmitkerlerdi irikteý jarysy boldy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Oǵan jeltoqsannan naýryzǵa deıin áskerı bólimshelerde, óńirlik qolbasshylyqtarda, Qarýly Kúshterdiń túrlerinde kezeń-kezeńimen ótkizilgen irikteý kezeńderiniń jeńimpazdary qatysty. Jalpy, jarysta 76 áskerı qyzmetshi baq synady, sonyń 20-sy - áıelder.

Halyqaralyq jarys qatysýshylarynyń kásibı sheberligi: «Atlet» áskerı-sport kezeńi; «Kásibı» áskerı-kásibı kezeńi; atys daıarlyǵy boıynsha «Snaıper» jarysy; «Kavaler» ádebı-kórkem jáne bı konkýrsy; áskerı sala tarıhy boıynsha «Erýdıt» baıqaýy arqyly anyqtalady.

Іrikteý qorytyndysy boıynsha eń úzdik nátıjege jetken 16 adam tańdaldy. Sonyń 11-i - er, 5-eýi - áıel. Olar endi baıqaýǵa daıyndyǵyn jalǵastyrady.

Eske sala keteıik, «Beıbitshilik jaýyngeri» halyqaralyq konkýrsy «2019 jylǵy Halyqaralyq armııa oıyndary» tizimine kiredi. Bıyl ol Armenııa Respýblıkasynda ótedi.

2018 jyly Qazaqstan komandasy atalmysh baıqaýda birinshi oryndy jeńip alǵan bolatyn.