Qazaqstanda bes aıda janýarlarǵa 71,1 mln vaktsına salyndy
«Aýyl sharýashylyǵy mınıstrligi elde epızootııalyq ahýaldy qamtamasyz etý boıynsha josparly jumys júrgizýde. Ol úshin zańnamalyq turǵyda «ortalyq-oblys-aýdan» qaǵıdaty boıynsha vertıkaldy veterınarlyq baqylaý qalpyna keltirildi. Bul, baqylaýǵa alynǵan ónimniń tasymaldanýyna baqylaýdy kúsheıtý jáne ónimniń «tanaptan ústelge deıin» qadaǵalanýyn qamtamasyz etýge múmkindik beredi. Ótken jyly Qazaqstan-Reseı ýchaskesinde 28 veterınarlyq baqylaý pýnkti jáne Qazaqstan-Qyrǵyz ýchaskesinde 4 veterınarlyq baqylaý pýnkti engizildi. Bul shara Qazaqstan aýmaǵyn janýarlardyń asa qaýipti aýrýlarynyń taralýynan, veterınarlyq-sanıtarlyq turǵydan qaýipti mal sharýashylyǵy ónimderiniń ákelinýinen qorǵaýǵa múmkindik beredi», - dedi mınıstr.
Onyń aıtýynsha, qabyldanǵan sharalar nátıjesinde bıylǵy bes aıda birli-ekili jiti jáne sozylmaly ınfektsııalardy qospaǵanda, Qazaqstanda janýarlardyń asa qaýipti aýrýlary boıynsha epızootııalyq ahýal turaqty.
«Máselen, 2020 jylǵy qańtardan mamyrǵa deıin janýarlar aýrýlarynyń jiti jáne sozylmaly ınfektsııalarynyń 80 oshaǵy ǵana tirkeldi. Veterınarlyq-profılaktıkalyq is-sharalar bekitilgen josparǵa sáıkes belgilengen merzimde oryndalýda. Aǵymdaǵy ýaqytta josparlanǵan 31,7 mln dıagnostıkalyq zertteýdiń 90,2 paıyzy oryndaldy. Janýarlar men qustardyń asa qaýipti 19 aýrýyna qarsy janýarlardy vaktsınalaý boıynsha josparlanǵan 150 mln manıpýlıatsııanyń 71,1 mln júrgizildi nemese osy jyldyń bes aıyndaǵy jospardyń 96,8 paıyzy oryndaldy. Jumys jalǵasýda», - dedi Saparhan Omarov.