Qazaqstanda benzın men dızeldiń qansha ýaqytqa jetetin qory bar

NUR-SULTAN. QazAqparat - QR Energetıka mınıstrligi dál qazirgi ýaqytta Qazaqstanda munaı ónimderiniń qansha qory qalǵanyn málim etti, dep habarlaıdy QazAqparat.

Qazaqstannyń munaı óńdeý zaýyttarynda munaı ónimderin óndirý, tıeý, tasymaldaý jáne qordy tolyqtyrý protsesi - táýlik saıyn toqtaýsyz júzege asyrylatyn protsess.

Óndirilgen munaı ónimderiniń jáne munaı bazalaryndaǵy, joldaǵy kólem - kún saıynǵy qor.

«Kún saıynǵy qor kórsetkishi - tolyqtyrylyp otyratyn kólem sanalatyn ındıkatıvtik kórsetkishter jáne atalǵan kúnder ótkennen keıin munaı ónimderin ishki naryqqa jetkizý toqtaıtyndyǵyn bildiretin kórsetkishter/faktorlar emes. Joǵaryda atalǵandaı, munaı óńdeý zaýyttarynda táýlik boıy munaı ónimderin óndirý men tıeý protsessteri toqtamaı, shtattyq rejımde jumys jasap turatyndyǵyn erekshe atap ótemiz» dep málim etti vedomstvodan.

Mınıstrlik aqparatyna sensek, 23 tamyz saǵat 18:00 deıin kelip túsken aqparat boıynsha elimizdegi munaı bazalaryndaǵy jáne joldaǵy AI-92 benzıniniń jıyntyq qory - 183,3 myń tonna, al dızel otynynyń qory - 221,7 myń tonna.