Qazaqstanda benzın men dızeldi otynnyń jıyntyq qory qansha

ASTANA. QazAqparat - QR Energetıka mınıstrligi munaı ónerkásibin damytý departamentiniń dırektory Qýanysh Qudaıbergenov Qazaqstandaǵy benzın men dızeldi otynnyń jıyntyq qoryn atady, dep habarlaıdy QazAqparat tilshisi.

«Іshki naryqtaǵy ahýal boıynsha tanystyryp ótsem, 2018 jyldyń 12 sáýirindegi jaǵdaı boıynsha AI-92 markaly benzıniniń jıyntyq qory 330 myń tonnany qurap otyr. Al dızeldik otyn boıynsha jıyntyq qor - 325 myń tonna. Jalpy jaǵdaı turaqty. Munaı ónimderin óndirýdi shekteý baıqalmaıdy», - dedi Qýanysh Qudaıbergenov OKQ-da ótken búgingi baspasós máslıhatynda.

Onyń aıtýynsha, otandyq munaı-óńdeý zaýyttaryn jańǵyrtý baǵytynda aýqymdy jumystar bitýge taıap qalǵan.

«Atap aıtqanda, Pavlodar MÓZ jańǵyrtý jumysyn aıaqtady, Atyraý MÓZ barlyq mehanıkalyq sharýalaryn aıaqtap, qazirgi ýaqytta qalǵan jumysty tártipke keltirýde. Atyraý MÓZ-de katalıtıkalyq krekıng ornatylyp, ol zaýyttaǵy benzındi eki esege kóp óndirýge qol jetkizilgenin estigen bolarsyzdar. Sondaı-aq, Shymkent MÓZ-di jańǵyrtý jumystary aıaqtalýǵa jaqyn», - dep túıdi Qýanysh Qudaıbergenov.