Qazaqstanda bekire tuqymdas balyqtardyń genetıkalyq tólqujaty jasalyp jatyr

ASTANA. QazAqparat - Qazaqstanda bekire tuqymdas balyqtardy ósirýmen aınalysatyn sharýshalyqtar bekire balyqtarynyń bıoalýantúrliligin saqtaý úshin halyqaralyq SITES (joıylyp ketý qaýpi bar jabaıy flora jáne faýna túrlerin saýdalaýdyń halyqaralyq Konventsııasy) Konventsııasynyń talaptaryn oryndaýǵa mindetti, dep habarlaıdy QR AShM Orman sharýashylyǵy jáne janýarlar álemi komıteti «QazBShǴZI» JShS-ǵa silteme jasap.

«Bekire ónimderin (ýyldyryq, balyq eti, balyqtandyrýǵa arnalǵan shabaqtar) eksporttaý men ımporttaýdy josparlaǵan sharýashylyqtar ózderi ósirip jatqan balyqtardyń zańdy ekenin rastaý úshin genetıkalyq saraptama men genetıkalyq tólqujattandyrý júrgizýi qajet», - dep atap ótti QR AShM Orman sharýashylyǵy jáne janýarlar álemi komıteti Facebook-tegi paraqshasynda.

«Qazaq balyq sharýashylyǵy ǵylymı zertteý ınstıtýty» JShS Qazaqstanda SITES-pen aınalysatyn biregeı ǵylymı uıym jáne osy uıym ǵana bekire balyqtaryn genetıkalyq tólqujattandyrýmen aınalysady. Qazirgi tańda «Qazaq balyq sharýashylyǵy ǵylymı zertteý ınstıtýty» JShS men «Kazakh Osseter» ǵylymı-óndiristik mekemesi bekire balyqtaryna arnalǵan genetıkalyq tólqujattardy mekeme derekqoryna engizý jumystaryn birlesip atqarýda. Atalǵan jumystardy júrgizýde shetel mamandary, Reseı memleketiniń «Búkilreseılik balyq sharýashylyǵy jáne muhıttaný ǵylymı-zertteý ınstıtýty» FMBǴM bekire jáne basqa da qundy gıdrobıonttar problemalarymen aınalysatyn molekýlıarly genetıka zerthanasynyń mamandary da qoldaý kórsetýde.

«Qazaq balyq sharýashylyǵy ǵylymı zertteý ınstıtýty» JShS-nyń ǵylymı qyzmetkerleri osy sharýashylyqta balyqtardyń analyq úıirlerin qalyptastyrýǵa tańdalǵan balyqtarǵa genetıkalyq tólqujattardy daıyndaý jumystaryn júrgizý nátıjesinde sharýashylyqtaǵy barlyq bekire balyqtary tańbalandy (elektrondy chıptar. Demek, tańba nómiri boıynsha balyqtar jaıly barlyq aqparattardy bilýge bolady (jasy, salmaǵy, jynysy). Kaspıılik bekire balyqtaryna (bekire, qortpa) derbes genetıkalyq tólqujattar, al súırik jáne sibir bekireleriniń úılerine genetıkalyq masstólqujattar jasaldy.

Sonymen qatar, osy jumystardyń ózgeshelikteriniń biri - ǵylymı qyzmetkerler ÝDZ dıagnostıka kómegimen bekire balyqtarynyń jynysyn jáne jynys ónimderiniń pisip - jetilýin anyqtady. Analyq úıirlerge tańdalyp alynǵan balyqtar bólek basseınderge jiberildi jáne olarǵa erekshe kútim qajet. Balyqtardy otandyq jemdermen qorektendiredi jáne qysqy jaǵdaıǵa beıimdeıdi.

Kóktemde tańdalǵan balyqtardan ýyldyryq alyp, bekire sanyn odan ári kóbeıtý josparlanýda.