Qazaqstanda bedeýligi bar adamdardyń tizilimin jasaý qajet – Saltanat Baıqoshqarova
«Bedeýlik máselesimen aınalysqanyma 32 jyl bolypty. Onyń ishinde ekstrakorporaldy uryqtandyrý ádisiniń alǵashqy mamany retinde engizgenime 25 jyl tolypty. Biz kóbine aqyly túrde qyzmet kórsettik. 2010 jyldan bastap memleketimiz 100 kvotadan bastasa, bıyl 1 myńnan sál asatyn kvotaǵa qol jetkizdik. Soǵan da qýanatynbyz. Biraq, keshegi Prezıdent Joldaýyndaǵy 7 myń kvota bólý sheshimi biz úshin úlken qýanysh boldy. Óıtkeni, bizge keletin adamdardyń barlyǵy birdeı 1 mıllıon teńge taba almaıdy. Bul aqshanyń jartysy dárige ketedi. Sondyqtan bul úlken kómek jáne patsıentterimizdiń barlyǵy qýanyp jatyr. Kútpegen jaǵdaı boldy. Biz kóp bolsa 2 ese kóbeıter dep oılaǵan edik», - dedi ol.
Degenmen, ol bul kvota elimizdegi bedeýlik máselesin 100 paıyz sheshe almaıtyndyǵyna nazar aýdartty. Esepte turǵan patsıentterdiń 60-70 paıyzyna 1 jyl ishinde múmkindik beretindigin atap ótti.
«Densaýlyq saqtaý mınıstrligimen biraz jumys istep, usynystar jasaǵanbyz. Ótken jyly mınıstrdi de shaqyryp, ortalyǵymyzdy kórsetken edik. Sol kezde kótergen máseleler áli sheshilgen joq. Endi Prezıdent Joldaýynan keıin mınıstrlikpen qyzý jumys isteımiz dep oılaımyn. Eń basty másele – elimizde bedeýliktiń tizilimi joq. Biz jalpy sózben «5, 6-shy otbasy bedeýlikpen betpe-bet keledi» dep aıtamyz. Alaıda, olardyń barlyǵyna arqaý bolatyn statıstıka joq. Sondyqtan tsıfrlandyrý zamanynda qansha adam bedeýlikke ushyraǵandyǵyn anyqtaý qajet. ıAǵnı, bedeý adamdardy tirkeý máselesin durystap, baza, tizilim jasaýymyz kerek. Densaýlyq saqtaý mınıstrliginiń buıryqtaryn, hattamalaryn ózgertýge tıispiz», - dedi Saltanat Baıqoshqarova.
Eske salaıyq, Prezıdent Qasym-Jomart Toqaev 1 qyrkúıek kúni jarııalaǵan Joldaýynda EKO boıynsha kvotany 7 myńǵa deıin arttyrýdy tapsyrdy.