Qazaqstanda baılanys operatorlarynyń tarıfi arzandaıdy

ASTANA. QazAqparat - Qazaqstandyq baılanys operatorlary tarıfterin tómendetpek. Bul týraly búgin tarıfterdi arzandatý máselesi qaralǵan dóńgelek ústel otyrysynda QR Aqparat jáne kommýnıkatsııalar vıtse-mınıstri Daryn Tuıaqov aıtty, dep habarlaıdy QazAqparat tilshisi.

«2018 jyldyń 23 qarashasynda mınıstrlikte úlken keńes ótkizip, oǵan barlyq operatorlardy shaqyrdyq. Baılanys operatorlary ózderi bastama kóterdi. ıAǵnı, áleýmettik tarıf jasaýǵa múmkinshilik bar», - dedi ol.

Onyń aıtýynsha, «Qazaqtelekom» 2019 jyldyń 1 qańtarynan bastap atalǵan áleýmettik tarıfti engizýdi josparlaýda. Ony quny 3499 teńgeni qurap, bastapqy tarıften 5 paıyzǵa arzan bolatyn. Atalǵan toptamaǵa jyldamdyǵy sekýndyna 10 Mbıtti quraıtyn ınternet jáne Qazaqstan boıynsha lımıtsiz qońyraý shalý kiredi. Al «Qaztranskom» alǵash ret baılanysqa qosylatyn abonentterge 50, al abonenttik tólemge 10 paıyz jeńildik jasamaq. Sonymen qatar ınternetke arnalǵan tólem qunyn da 15 paıyzǵa arzandatýdy josparlap otyr.

«Transtelekom» kompanııasy Ekinshi dúnıejúzilik soǵys ardagerlerine 5 paıyz jeńildik jasaýdy usyndy. Jalpy, atalǵan operatordyń tarıfi óte tómen. Aýyl turǵyndaryna 529, al qalalyqtarǵa 797 teńgeni quraıdy», - deıdi Daryn Tuıaqov.