Qazaqstanda «Batyl Toıtarys – 2022» vedomstvoaralyq oqý-jattyǵý bastaldy

NUR-SULTAN. QazAqparat – Elimizdiń 9 óńirinde Qarýly kúshter qurylymdary men ózge vedomstvolardyń «Batyl toıtarys – 2022» birlesken oqý-jattyǵýy ótip jatyr. Bul týraly QR Qorǵanys mınıstrliginen málim etti, dep habarlaıdy QazAqparat.

Oqý-jattyǵý Memleket basshysy Qasym-Jomart Toqaevtyń kúshtik qurylymdar arasyndaǵy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý, sondaı-aq vedomstvoaralyq úılestirýdi kúsheıtý jónindegi tapsyrmalaryn oryndaý aıasynda uıymdastyryldy.

«Batys toıtarys – 2022» keshendi strategııalyq komandalyq-shtabtyq oqý-jattyǵýy Aqtóbe, Almaty, Atyraý, Jambyl, Qyzylorda, Mańǵystaý, Túrkistan oblystarynyń, sondaı-aq Almaty jáne Shymkent qalalarynyń aýmaǵynda ótedi.

Sharaǵa Qarýly kúshterdiń, basqa da áskerler men áskerı quralymdardyń quramalary men bólimderi, ortalyq memlekettik jáne jergilikti atqarýshy organdar jumyldyrylǵan.

«Oqý-jattyǵýdyń alǵashqy kezeńinde memlekettik shekarany qorǵaýdy kúsheıtý, qoǵamdyq qaýipsizdikti qamtamasyz etý, áskerı qaýip-qaterlerdiń órshýi jaǵdaıynda terrorızmge qarsy operatsııalardy júrgizý kezindegi ózara is-qımyl máseleleri pysyqtalady.

«Batyl Toıtarys – 2022» oqý-jattyǵý aǵymdaǵy jylǵy 16 sáýirge deıin jalǵasady», - delingen Qorǵanys mınıstrliginiń habarlamasynda.