Qazaqstanda basylǵan túrki álemine ortaq oqýlyq Túrkııadaǵy mektep baǵdarlamasyna endi

ASTANA. QazAqparat - Halyqaralyq Túrki akademııasy (TWESCO) ázirlegen túrki álemine ortaq tarıh oqýlyǵy mektep baǵdarlamasyna tańdamaly pán retinde engizildi. Bul týraly Astanadaǵy ótip jatqan «Ortaq túrki ádebıeti» oqýlyǵynyń talqylaý jıynynda TWESCO prezıdenti Darhan Qydyráli málim etti, dep habarlaıdy «QazAqparat» HAA tilshisi.

«Memleket basshylarymyzdyń tapsyrmasy boıynsha biz Halyqaralyq Túrki akademııasy birneshe jobany qolǵa alǵanbyz. Sonyń biri - «Ortaq túrki ádebıeti» oqýlyǵy. Otyrysty bastamaı turyp sizdermen bir jaqsy habardy bóliskim kelip otyr. Taıaýda ǵana túrki álemine ortaq tarıh oqýlyǵyn ázirlep bitkenbiz. Túrkııa Bilim mınıstrliginen bizge hat keldi. Túrkııa Bilim mınıstrligi biz daıyndaǵan oqýlyqty Túrkııada tańdaýly pán retinde bıyldan bastap kirgizip otyr eken», - dedi TWESCO basshysy.

Darhan Qydyráliniń aıtýynsha, Halyqaralyq Túrki akademııasy úshin bul zor qýanysh.

«Atalmysh oqýlyq Qazaqstandaǵy Nazarbaev Zııatkerlik mektepterinde oqytyla bastaǵan. Endigi kezekte Túrkııa mektepterine de engizilip otyr. Bizdiń paıymdaýymyzsha, Sammıtte (Túrki tildes elderdiń sammıti - avt.) sheshim qabyldanǵan jaǵdaıda Qyrǵyzstan, Ázerbaıjan jáne Qazaqstandaǵy barlyq mektepterge osy Akademııa ázirlegen oqýlyq engiziletin bolady degen úmittemiz», - dedi Darhan Qydyráli.

Aıta ketsek, Beıbitshilik jáne Kelisim saraıynda ótip jatqan ortaq oqýlyqty talqylaý jıynyna birneshe túrki tildes elderdiń ókilderi qatysyp otyr. Atap aıtqanda, ortaq oqýlyqty talqylaý úshin Ázerbaıjan memlekettik pedagogıkalyq ýnıversıtettiń dotsenti Bilál Hasanov, Qyrǵyz Respýblıkasy UǴA múshesi, Halyqaralyq qyrǵyz-túrik «Manas» ýnıversıteti Shyǵys tilderi bóliminiń meńgerýshisi Osmanakýn Ibraımov, Túrkııa Respýblıkasy Ulttyq bilim berý mınıstrligi Eýropa Odaǵy jáne syrtqy baılanystar departamentiniń dırektory Ilhan Aksoı kelgen.