Qazaqstanda baspana baǵasynyń ósýi baıaýlaıtyny boljandy

NUR-SULTAN. QazAqparat – Elimizde turǵyn úıdiń baǵasyna tikeleı áser etetin negizgi faktorlar ataldy, dep habarlaıdy QazAqparat tilshisi.

«Aldymen baǵaǵa áser etetin ol – ınflıatsııa. Ekinshi faktor – halyqtyń demografııalyq kórsetkishi. Ótken jyly Qazaqstanda 450 myń bala dúnıege keldi. Bul rekordtyq kórsetkish. Týý kórsetkishiniń ósýine qarap, qazaqstandyqtardyń bolashaǵyna degen nyq senimdi baıqaýǵa bolady. Otbasy músheleri artqan saıyn turǵyn úıdiń de aıasyn keńeıtý máselesi týyndaıdy»,- dedi «Otbasy bank» AQ-nyń basqarma tóraǵasy Lázzat Ibragımova Ortalyq kommýnıkatsııalar qyzmetinde ótken baspasóz máslıhatynda.

Bank basshysy keltirgen málimetke sáıkes, turǵyn úı baǵasyna áser etetin úshinshi faktor – álemdegi áleýmettik tendentsııa.

«Pandemııaǵa baılanysty kóp adamnyń baspana máselesine qatysty kózqarasy men ustanymy ózgerdi. Adamdar qashyqtan jumys isteýge kóshti. Bul óz úıi bolýynyń mańyzdylyǵyn arttyra tústi. Sondaı-aq tórtinshi faktor – turǵyn úı máselesin sheshýde zeınetaqy qoryndaǵy jınaqty qoldaný múmkindigi. Árıne, qazir zeınetaqy jınaǵyn qoldaný múmkindigi tómendedi. Sáýir aıynyń qorytyndysy boıynsha 20 paıyzǵa azaıdy. Bıylǵy jarty jyldaǵy esep boıynsha elimizde baspana baǵasynyń ósýi baıaýlaıdy dep oılaımyn. Biraq baǵanyń aıtarlyqtaı tómendeýi múmkin emes», - deıdi ol.

Sondaı-aq atalǵan baspasóz máslıhatynda «Baqytty otbasy» baǵdarlamasy boıynsha ótinim qabyldaýdyń keıinge shegerilgeni aıtylǵan bolatyn.