Qazaqstanda baspana baǵasy turaqtandy

NUR-SULTAN. QazAqparat – QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov baspana baǵasynyń ósýin tejeý úshin qandaı sharalar júrgizilgenin aıtyp berdi, dep habarlaıdy QazAqparat.

«Jyl basynan beri bastapqy turǵyn úıdiń baǵasy 5%-ǵa ósti. Qazir dınamıka tómendedi. Sońǵy aıda shamamen 0,8%-ǵa ósim baıqaldy. Turǵyn úı naryǵyndaǵy baǵa qymbattaýynyń negizgi sebebi – naryqqa 1 trln 200 mlrd teńge zeınetaqy aktıvteriniń túsýi edi. Biz baǵanyń ósýin tejeý úshin úı salýshylarǵa baǵanyń tómendeýi týraly 11 eskertý jiberdik, olarmen kelissózder júrgizdik jáne qazir turǵyn úı baǵasynyń dınamıkasy turaqtanǵanyn baıqap otyrmyz», - dedi R. Ahmetov Ortalyq kommýnıkatsııalar qyzmetinde ótken baspasóz máslıhatynda.

Sonymen birge, ol «Bırjalyq saýdanyń engizilýine baılanysty benzın baǵasynyń ósýi múmkin be?» degen suraqqa jaýap berdi.

«Qazirgi ýaqytta munaı ónimderiniń óndirisi tutyný kólemin tolyǵymen jabady. Tutyný jaǵdaıynda da Atyraý, Shymkent zaýyttaryndaǵy munaı ónimderiniń qorlary suranysty qanaǵattandyrýǵa jetkilikti. Bizde benzın tapshylyǵy joq ekenin eskersek, bırjalyq saýda-sattyqtyń engizilýine baılanysty baǵanyń kúrt ósýine esh negiz joq», - dep jaýap berdi agenttik ókili.

Buǵan deıin R. Ahmetov azyq-túlik baǵasynyń qymbattaý sebepterin túsindirgen edi.