Qazaqstanda baspana baǵasy qoljetimdi bola bastady - QIK

ALMATY. QazAqparat - Qazaqstan ıpotekalyq kompanııasynyń basqarma tóraǵasy (QIK) Ádil Muhamedjanov jyljymaıtyn múlik naryǵy men ıpotekalyq nesıeleý naryǵyndaǵy jaǵdaı týraly aıtty, dep habarlaıdy QazAqparat tilshisi.

«Baspana» retinde Ulttyq banktiń naryqqa kelýiniń arqasynda ıpotekalyq nesıeleýdi tejep turǵan keıbir máseleler sheshildi. Budan bólek, Májiliste kúzgi tyńdalymda ıpotekalyq naryqqa dem beretin zańnamalarǵa ózgerister engiziledi. Biz qazir ekinshi deńgeıli bankterdiń osy salaǵa qaıtyp kelip jatqanyn kórip jatyrmyz», - dedi Ádil Muhamedjanov brıfıngte.

Ol  zańnamalarǵa kepildi óndirip alý protsedýrasyn qysqartý máseleleriniń engiziletinin atap ótti.

Budan bólek, Ádil Muhamedjanov Prezıdent Joldaýynda eldegi jalaqy mólsheriniń ósetini atalyp ótkenin tilge tıek etti.

«Sáıkesinshe, bul Qazaqstan azamattarynyń tólem qabilettiligi men tabysyna áser etetin bolady. Ipotekalyq nesıeleýdiń bolashaǵy aıtarlyqtaı jaqsy bolady dep oılaımyn», - dep atap ótti QIK.

Sondaı-aq, ol jyljymaıtyn múlik qunynyń túsip jatqanyna toqtaldy.

«Baǵalar qoljetimdi bolyp jatyr. Qurylys kompanııalary baǵalardy ósirip jatqan joq. Baspana quny satyp alýǵa ońtaıly bolyp tur, bul ıoptekany damytýdyń negizgi qozǵaýshy kúshi», - dep naqtylady Ádil Muhamedjanov.

Eske salaıyq, QIK Qazaqstanda iske qosylatyn jańa ıpoteka týraly aıtty.