Qazaqstanda baspana baǵasy bir jylda qalaı ózgerdi

NUR-SULTAN. QazAqparat – QR Ulttyq ekonomıka mınıstrligi Statıstıka komıteti turǵyn úı naryǵynda baǵalar qalaı ózgergenin málim etti, dep habarlaıdy QazAqparat.

Statıstıka komıtetiniń málimetine sáıkes, 2020 jylǵy sáýirde onyń aldyńǵy aımen salystyrǵanda jańa turǵyn úılerdi satý, abattandyrylǵan jáne abattandyrylmaǵan baspanany satý-satyp alý baǵalary ózgerissiz qaldy. Abattandyrylǵan páterdi jalǵa alý tólemi 0,8% joǵary boldy.

Al bir jylda turǵyn úı naryǵynda baǵa kelesideı ózgergen:

Bıylǵy sáýir aıynda taza árlengen jańa turǵyn úıdiń bir sharshy metri 297 170 teńgeni (respýblıka boıynsha ortasha baǵa) qurady. Bul 2019 jyldyń sáýirimen salystyrǵanda 6,3 paıyzǵa qymbat.

Bıylǵy sáýirde abattandyrylǵan páterdiń bir sharshy metriniń quny 206 072 teńgege baǵalandy. Bir jylda baǵa 7 paıyzǵa artqan.

Abattandyrylmaǵan, jer úıdiń bir sharshy metriniń baǵasy ótken sáýir aıynda 128 097 teńge boldy. 2019 jyldyń sáýirimen salystyrǵanda 6,5 paıyzǵa joǵary.

Kópqabatty úıde páterdi jalǵa alý tólemi bir sharshy metri úshin 1574 teńgeni qurady. Baǵa bir jylda 8,8 paıyzǵa ósken.