Qazaqstanda básekelestikti odan ary damytý qalaı júrgiziledi
«Búginde elimizdegi básekelestiktiń jaı-kúıi negizgi taýarlyq naryqtarǵa shoǵyrlanýynyń jáne ekonomıkadaǵy memleket qatysýynyń joǵary deńgeıimen sıpattalady. Osyǵan oraı bizdiń jumysymyz jáne zań jobasynyń normalary ekonomıkaǵa memlekettiń qatysýymen baılanysty úsh negizgi retteýshi kedergini sheshýge baǵyttalǵan», - dedi zań jobasyn tanystyrǵan QR Básekelestikti qorǵaý jáne damytý agenttigi tóraǵasynyń birinshi orynbasary Rústem Ahmetov.
Onyń atap ótýinshe, birinshisi «negizgi qýattarǵa» qoljetimdiliktiń shekteýliligi bolyp tur.
«Bul - ınfraqurylymdar men resýrstar. Bıznes olarǵa qol jetkizbeı tutynýshylarǵa qyzmet kórsete almaıdy. Qoljetimdiliktiń shekteýli bolýy bıznestiń qoldanystaǵy túrlerin keńeıtýdi nemese jańa túrlerin damytýdy qıyndatady. Ekinshisi – baǵa qalyptastyrýdyń burmalanýy. Búginde Kásipkerlik kodekste baǵasy rettelýge jatatyn taýardyń 14 túri qarastyrylǵan. Buǵan qosa taýarlyq naryqtardyń basym bóligine ákimshilik baǵa baqylaý is-sharalary qoldanylady. Tabıǵı nemese memlekettik monopolııa bolmaǵan jaǵdaıda baǵa retteý ınvestıtsııa tartýdy, ınnovatsııa men básekelestikti damytýdy tejeıdi», - dedi agenttik tóraǵasynyń birinshi orynbasary.
Rústem Ahmetov úshinshi kedergi retinde irikteý arqyly qamqorlyq tanytýdy atady.
«Bul – jekelegen kompanııalarǵa naryqtyq bılikti negizsiz júkteıtin quqyqtyq aktiler qabyldaý, básekelestiktiń allokatıvti tıimdligin burmalaıtyn ataýly sıpattaǵy memlekettik qoldaý is-sharalary», - dedi ol.