Qazaqstanda básekelestik ortany jaqsartý úshin qandaı sharalar jasalady

NUR-SULTAN. QazAqparat – QR Básekelestikti qorǵaý jáne damý agenttigi tóraǵasynyń Serik Jumanǵarın básekelestikti damytý jónindegi sharalardy iske asyrýdyń qandaı áser beretinin aıtyp berdi, dep habarlaıdy QazAqparat tilshisi.

«Biz 2025 jylǵa qaraı munaı ónimderiniń bırjalyq saýdasyn 20%-ǵa deıin, suıytylǵan gazben almasýdy kelesi jyly 100%-ǵa deıin arttyrýdy josparlap otyrmyz. Ekonomıkalyq tıimdilik 1,9 trıllıon teńgeden asady. Elektr energııasynyń ortalyqtandyrylǵan saýda-sattyq kólemi 2025 jylǵa qaraı 30% deıin, 150 mıllıard teńgeden astam somaǵa ulǵaıtylady. Bıýdjet qarajatyn jyl saıyn 20 mıllıardqa únemdep jáne shaǵyn jáne orta bıznestiń shyǵyny 31 mıllıard teńgege deıin azaıady. Market pleısteriniń damýy elektr energııasyn jetkizýshini aýystyrý ýaqytyn 10 ese qysqartady», - dedi agenttik tóraǵasy Úkimettiń búgingi otyrysynda.

Sonymen birge, 2025 jylǵa qaraı áýejaılar aýmaǵynda keminde 7 qyzmet kórsetý túrine erkin qol jetkizýdi qamtamasyz etý kózdelgen.

«Baılanys salasyndaǵy kabeldik kárizge qoljetimdilikti qamtamasyz etý, respýblıkalyq jáne oblystyq mańyzy bar qalalardaǵy mýnıtsıpaldy avtobýs parkteriniń sanyn 0-ge deıin qysqartý, 2025 jylǵa qaraı memlekettik tapsyrys sanyn 50% qysqartý, 2025 jylǵa qaraı 20 biryńǵaı operatordy ońtaılandyrý – osynyń barlyǵy Qazaqstandaǵy básekelestik ortany jaqsartýǵa jáne damytýǵa múmkindik beredi», - dedi S. Jumanǵarın.