Qazaqstanda bas bostandyǵynan aıyrylǵandar sany 26,2 paıyzǵa kemidi

ASTANA. QazAqparat - QR Prezıdentiniń Qazaqstandy «Túrmedegi adamdar» sany joǵary 50 eldiń qatarynan shyǵarý jónindegi tapsyrmasy oryndaldy. Bul týraly QR Bas prokýratýrasynyń baspasóz qyzmetinen habarlady.

«Sottalǵandarǵa shartty túrde merzimimen buryn bosatý jáne jazany neǵurlym jeńiline aýystyrý tárizdi yntalandyrý sharalaryn qoldaný túrme halqyn 8 myńǵa azaıtýǵa múmkindik berdi jáne ol alǵash ret 40 myńnan tómendedi. Bas bostandyǵynan aıyrylǵandar sany 26,2 paıyzǵa nemese 8 673-ten 6 871 tulǵaǵa deıin kemidi», - delingen vedomstvo habarlamasynda.
Sonymen qatar, Bas prokýratýranyń aqparatyna sáıkes, qylmystar úshin kóbinese bas bostandyǵynan shekteý jazasy qoldanylyp keledi. Ol 24 paıyz jaǵdaıda taǵaıyndalǵan. Aıyppuldar 7 ese (835-ten 6095-ke deıin), qoǵamdyq jumystar 5 ese (660-tan 3392-ge deıin) kóp belgilengen.
«Merzimimen buryn bosatý týraly ótinishterdi qanaǵattandyrý 70 paıyzǵa jetti.
Nátıjesinde Qazaqstan halyqaralyq túrme reıtınginde 55-shi orynǵa qaraı jyljydy jáne aldyńǵy qatarly eýropalyq eldermen bir qatarǵa ornalasty», - delingen aqparatta.