Qazaqstanda bankrot dep tanylǵandar arasynda 79 jastaǵy qarııa bolǵan

<p>Bankrot dep tanylǵandardyń arasynda er azamattar 58 paıyzdy qurady.&nbsp;Bul týraly Qarjy vıtse-mınıstri Erjan Birjanov málim etti, dep habarlaıdy <a href="Kazinform" target="_blank" rel="noopener">Kazinform</a>.</p>

Atap aıtqanda, qazir jekelegen boryshkerler keıbir zańnamalyq kedergilerdiń saldarynan bankrottyq rásimin keńinen qoldana almaı otyr.

«Qazir tıisti zańnamalyq ózgertýler daıyndap jatyrmyz. Birinshiden, sottan tys bankrottyqqa jatatyn qarjy uıymdarynyń tizbesin keńeıtý eskerilgen. Sebebi, qazir birqatar qarjy uıymdary (lıtsenzııasynan aıyrylǵan, jabylǵan) tıisti tizimde bolmaǵandyqtan, biraz adam ótinish bere almaı otyr. Sondyqtan zańnamaǵa ózgeris engizbekpiz», - dedi E. Birjanov Ortalyq kommýnıkatsııalar qyzmetindegi baspasóz máslıhatynda.

Munymen qosa, azamattardy sottan tys bankrottyqty qoldaný týraly ótinishke qosymsha qujattardy qosa berý mindetinen bosatý qarastyrylǵan. Qajet málimetterdi tıisti uıymdardyń derekqorynan alý josparlanǵan.
Sonymen qatar, tólem qabilettiligin qalpyna keltirý jospary bekitilgennen keıin, boryshkerdiń shetelge shyǵýyna tyıymdy alyp tastaý eskerilgen.

«Statıstıkaǵa qaraǵanda, bankrot dep tanylǵandardyń arasynda er azamattar 58 paıyzdy, al áıelder 42 paıyzdy qurady. Bankrottyq berilgen eń egde jastaǵy adam 79-da ekeni anyqtaldy. Ol kisi Qyzylorda oblysynda turady. Eń jasy Almaty oblysynyń turǵyny - 20 jasta», - dedi vıtse-mınıstr.

Onyń sózine qaraǵanda, adamdardyń kóbisi ózderiniń qaryzynyń somasyn tolyq bilmeıdi.

Budan buryn habarlanǵandaı, 9 mlrd teńgeden astam borysh somasyna 6,4 myń adam bankrot dep tanyldy.