«Qazaqstanda bankrot bolar bank joq!» - baspasózge sholý
Aldaǵy on-on bes jylda Qazaqstannyń bas qalasy - Astana adam tanymastaı ózgeredi, dep habarlaıdy « Aıqyn » basylymy. Elordany túrlendirip, jańa kórkem beınesin túzetin jobalarmen keshe Qazaqstan Kóshbasshysy jan-jaqty tanysty.
"Osy kúni Prezıdent Nursultan Nazarbaev «Astana qalasynyń Bas jospary» ǵylymı-zertteý jobalaý ınstıtýtyna kelgen bolatyn. Instıtýttyń jaýapty tulǵalary Memleket basshysynyń nazaryna Astananyń 2030 jylǵa deıingi damýynyń Bas josparyna engizilgeli otyrǵan túzetýlerdi jáne elordalyq aglomeratsııany qalyptastyrý jobasyn usyndy, sondaı-aq bas qalanyń jańa kólik júıesin qurý barysy jaıynda baıandady. 2030 jylǵa deıingi Bas josparǵa «EKSPO - 2017» kórmesin ótkizýge baılanysty túzetýler engizý qajet bolǵan eken. «Astana Bas jospardyń» bas sáýletshisi Baqtybaı Taıtalıevtiń túsindirýinshe, bul rette tek jaqsartý men ózektilendirý júrgizilgeli tur. Al negizgi kórsetkishter ózgerissiz qalady: elorda turǵyndarynyń sany 2030 jylǵa qaraı 1 mıllıon 220 myń adamǵa jetedi dep kútilýde. Qala aýmaǵy kóp keńeıtilmeıdi: on bes jyldan keıin 71 myń gektar kóleminde qalady", - delinedi « Astana adam tanymastaı ózgeredi » atty maqalada.
Astanaǵa qosylýǵa umtylǵan «Qosshy», «Talapker» sekildi qala mańyndaǵy kentter 2030 jyly da elorda aýmaǵyna kirmeıdi dep josparlanýda. Biraq olar «Astanalyq aglomeratsııa» jobasyna enbek. Ol jalpy qarasy 111 kentti qamtıdy dep tuspaldanýda. Bul eldi mekenderdiń árqaısysy belgili bir salaǵa mamandanyp, bas qalaǵa qyzmet kórsetedi.
«EKSPO - 2017» jahandyq kórmesine 5 mıllıondaı týrıst keledi dep boljanýda. Bul rette astanalyqtar men qaptaǵan qonaqtardyń azyq-túlikke jáne demalysqa degen qajettilikterin óteý osy aglomeratsııaǵa júktelmek. Tıisinshe, qala mańy kentterinde demalys úıleri, at sporty bazalary, shańǵy bazalary, zamanaýı jabdyqtalǵan jaǵajaılar jáne basqa da oıyn-saýyq, demalys oryndary boı kóterýleri tıis.
Sondaı-aq "Aıqyn" basylymynyń búgingi sanynda "Qazaqstanda bankrot bolar bank joq!" atty maqala jarııalandy.
"Sanktsııalardan áýre-sarsańǵa túsip jatqan kórshi Reseıde ótken aıdyń ózinde onǵa jýyq bank bankrot bolyp, jabylyp qaldy. Al Qazaqstanda «lıtsenzııasyn keri qaıtaryp alý» qaýpi tónip turǵan bank joq pa? «Joq!» dep senimmen málimdedi keshe, Senatta Ulttyq bank tóraǵasynyń orynbasary Q.Qojahmetov", - delingen atalmysh materıalda.
«Qazaqstanda jabylý aldynda turǵan birde-bir bank joq. Buǵan deıin «Alıans bank», «BTA» jáne «Temir bank» osyǵan uqsas jaǵdaıǵa dýshar bolǵan edi. Olardy memleket qutqaryp qaldy. Qazir atalǵan bankter jeke ınvestorlarǵa satyldy» dedi ol. Ulttyq bank basshylyǵynyń ókili taǵy bir qyzyqty derek keltirdi: táýelsizdik jyldarynda eki júzge jýyq qarjylyq qurylym dármensizdikke dýshar bolyp, esigine qara qulyp salypty: «90-jyldardyń basynda respýblıkada 223 banktiń qyzmetine lıtsenzııa bolǵan! Qazir elimizde tek 38 bank qana bar. Osydan-aq qansha banktiń qyzmetin toqtatqandyǵyn baǵamdaı berińiz!» dedi jýrnalısterge bergen suhbatynda Q.Qojahmetov. Nátıjesinde, otandyq naryqta negizinen, qýatty, básekege qabiletti qarjylyq qurylymdar ǵana qalǵan kórinedi.
Qaraǵandylyq kásipker Dıdar Toǵyzbaev qodas ósirýdi qolǵa aldy, dep jazady "Egemen Qazaqstan".
"Arqa óńiri úshin tańsyq sanalatyn janýarlardy bizdiń tabıǵatymyzǵa beıimdep, jersindirip kórýge bel baılaǵan. Bıyl kóktemde ol sonaý Hakasııaǵa eki ret baryp, 140 bas tıbet «sıyryn» satyp ákeledi de, olardy Qarqaraly aýdanynyń Nurmaqov atyndaǵy aýyldyq okrýgine jetkizedi. Dıdar bul janýarlar óńir tabıǵatyna tez úırenip, jumsalǵan qarajatty molynan aqtaıdy dep senedi. Kásipker jigit qodastyń júnin qyrqyp, al etinen shujyq, konservi óndirisin jolǵa qoıýdy kózdep otyrǵan jaıy bar. Tabynnyń qojaıyny Dıdar Toǵyzbaev buǵan deıin ózimizge úırenshikti mal sharýashylyǵymen aınalysyp kelgen eken. Endi ol qodas ósirýmen shuǵyldanýǵa táýekel etip otyr", - delingen "Qarqaralydaǵy qodastar" atty materıalda.
"Osy Qarqaraly aýdanyndaǵy jaıylymdar asa aýqymdy. Bizge keregi sol. Osy jaqta qys aılarynda qasqyr aýlap, jergilikti tabıǵatty, bul jerge tán aýa raıy qubylystaryn jyldar boıy bajaılap kórgenbiz. Qazir qodastarymyz jaıylyp júrgen jer taýlardyń tasasynda, yqtasyn jerde ornalasqan. Bul jerdiń qysy jaıly. Al myna qodastar buǵan deıin tabıǵaty qatal, taýly, oty mardymsyz jerlerde tirshilik etip kelgen. Bul jaqta olar úshin kerek jaǵdaıdyń bári bar. Onyń ústine, olarǵa asa shyǵyndala da qoımaımyz. Negizgi paıdasy da sonda. Ózimizdiń úırenshikti iri qaralarymyzdy alaıyq. Olarǵa jemshóp ázirleý ońaı sharýa emes. Qodastar bolsa, qar astynda qalǵan shópti ózderi-aq arshyp jeıdi. Moıyndary jýan janýarlar qardy basymen arshyp daǵdylanǵan. Taǵy bir jaqsy ereksheligi, qodastar tek tabynymen júrip jaıylady, eshqashan saıaq ketpeıdi. Belgili bir jerdiń jaıylymyn ottap bolǵan soń, úıirimen kóship basqa jerge baryp jaıylady. Onyń ústine, bular jyrtqysh ańdardan taısalmaıdy. Tabynymen júrgen qodastarǵa shabýǵa qasqyrlardyń batyly jete qoımaıdy. ıAǵnı, baqtashylarymyzǵa olardy baǵý asa qıyn emes. Biz bul janýarlardy tańsyq bolǵany úshin emes, aıtarlyqtaı paıda túsirýge bolady degen úmitpen ákelip otyrmyz. Eger úmitimiz aqtalyp jatsa, olardyń sanyn bes júz basqa deıin jetkizsek pe deımiz. Kóbeıtkende de, tabıǵı ósimin kútip otyrmaımyz, tıimdiligi rastalyp jatsa, ınvestıtsııa salyp, taǵy da birtalaı qodasty satyp ákelý josparda bar", - deıdi kásipker gazetke bergen suhbatynda.
"Túrkistan" basylymy bolsa, bıliktiń zańsyz taksılerge qarsy bastalǵan naýqanǵa qatysty "Zańsyz taksılerdi qýdalaý maýsymy kimniń jeńisimen aıaqtalatyny belgisiz" degen taqyryppen maqala jarııalady.
"Áýejaıdaǵy halyqtyń qyr sońynan qalmaıtyn zańsyz taksı júrgizýshileri endi ákimshilik jazaǵa tartylady. Qyzmetin zań júzinde rásimdemeı tabys taýyp júrgen júrgizýshilerge jolaýshy tasymaldaýǵa burynnan-aq ruqsat joq. Alaıda mundaı tyıymǵa nazar aýdaryp jatqan taksı júrgizýshilerin baıqaı qoımadyq. Sol sebepti Almaty qalasy ákimdigi zańsyz taksı qyzmetin túpkilikti toqtatyp, kónbegenderge 30 myń teńge mólsherinde aıyppul salýǵa mindettemek", - deıdi "Túrkistan.
Taksı júrgizýshileriniń qyzmetin zańdastyryp, memleket qazynasyna tıisti salyq tólep turý máselesi jyl saıyn kóterilip keledi. Atalmysh másele bıylǵy jyldyń basynda da talqyǵa túsken. Ústimizdegi jyldyń sáýir aıynan bastap taksı júrgizýshileriniń barlyǵy jeke kásipker retinde tirkelip, tabysynyń belgilengen mólsherin memleketke salyq retinde tóleýge mindettelgen. Al olardyń salyqtan jaltarmaýyn salyqshylar qatań qadaǵalaýy tıis.
"Árıne, mundaı jańalyq zańsyz túrde jolaýshy tasymaldaý arqyly nápaqasyn taýyp júrgen júrgizýshilerge unaı qoımaıtyny beseneden belgili. Óz kezeginde taksı júrgizýshileri «Biz memleketke salyq tóleý úshin áýeli bizdiń jaǵdaıymyzdy jasaý kerek» degen talaptaryn da aıtty. Quzyrly organdar bul máseleni qolǵa alǵandarymen, júrgizýshilerge óz talaptaryn oryndata almaǵan tárizdi. Óıtkeni memleketke esh salyq tólemesten jolaýshy tasymaldap júrgen taksı júrgizýshileri áli de azaıǵan joq. Almaty qalasy ákiminiń jaz bastalysymen zańsyz taksı qyzmetine tosqaýyl qoıý týraly pármen berýi de sondyqtan", - delingen maqalada.
Atyraý kolledjderiniń birinde bilim alatyn oqýshy qyz radıkaldy dinı aǵymnyń quramyna kirý maqsatynda Sırııaǵa attanbaq bolǵan, dep habarlaıdy resmı tilde jarııalanatyn "Ekspress K" basylymy. Gazettiń jazýynsha, boıjetkendi mundaı qate qadamnan teolog mamandar aman saqtap qaldy.
"Bul oqıǵa týraly "Shapaǵat" qoǵamdyq qorynyń dırektory Qanat Jumaǵul aıtyp berdi. Onyń sózine qaraǵanda, aqparattyq-nasıhattyq top oqý oryndaryna baryp, mektep jáne kolledj oqýshylarymen tildesken. Kolledjde oqıtyn qyzdardyń biri ınternet arqyly Ońtústik Qazaqstan oblysynda turatyn jas jigitterdiń birimen tanysqan. Ol sol jigitpen hat almasyp turady jáne onymen birge Sırııaǵa barýdy josparlaýda. "Shapaǵat" teologtary mundaı qate sheshimnen bas tartýǵa úlken kúsh saldy. Onyń ústine dintanýshylar stýdentke Islam dinindegi kóptegen aǵymdar arasyndaǵy aıyrmashylyqty túsindire aldy", - delingen "Eto ne tvoıa voına" atty maqalada.