Qazaqstanda balalaryna qorlyq kórsetetin otbasylardy anyqtaýdyń algorıtmi ázirlendi

NUR-SULTAN. QazAqparat – Elimizde otbasynda qysymǵa tap bolyp, qorlyqqa ushyraıtyn balalardy anyqtaýdyń arnaıy metodıkasy ázirlendi. Bul týraly QR ІІM Ákimshilik polıtsııa komıteti basqarmasy basshysynyń orynbasary Jasulan Jumanalın málim etti, dep habarlaıdy QazAqparat tilshisi.

«Balalardy uryp-soǵyp, olarǵa psıhologııalyq qysym kórsetkender qatań jazalanýy tıis. Óz kezeginde polıtsııa qyzmetkerleri úılerdi aralaý jedel profılaktıkalyq sharasy kezinde atalǵan máselege mán beredi. Ásirese kámelet jasyna tolmaǵan balalar men jasóspirimderdi tárbıelep otyrǵan otbasylar erekshe nazarda. Osy maqsatta bizdiń mınıstrlik balalarǵa kúsh kórsetip, zorlyq-zombylyq bolýy múmkin otbasylardy anyqtaýdyń arnaıy metodıkasy men algorıtmin ázirledi», - dedi Jasulan Jumanalın mınıstrlikte ótken baspasóz máslıhatynda.

Odan bólek, ákimshilik polıtsııa komıteti basshysynyń orynbasary, quzyrly mınıstrlikpen birlesip, bilim mekemelerinde balalardyń qaýipsizdigin qamtamasyz etýdiń 2021-2022 jyldarǵa arnalǵan jol kartasy daıyndalǵanyn tilge tıek etti.

«Ázirlengen jol kartasynyń aıasynda birqatar shara qarastyrylǵan. Naqty aıtsaq, bilim mekemeleri qabyrǵasynda tótenshe jaǵdaıda áreket etý jattyǵýlaryn ótkizý, lańkestik áreketterdiń aldyn alý sharasyn uıymdastyrý qolǵa alynady. Sol sııaqty, barlyq deńgeıdegi bilim berý uıymdaryn ortalyqtandyrylǵan beınebaqylaý júıesimen qamtamasyz etý de josparlanǵan», - deıdi ol.

Buǵan deıin elimizde balalardyń qatysýymen 400-den astam jol-kólik oqıǵasy tirkelgenin habarlaǵan edik. Sondaı-aq, brıfıngte bilim mekemelerin lańkestik áreketterden qorǵaýdyń arnaıy nusqaýlyǵy bekitilgeni aıtyldy. Odan bólek, Qazaqstanda balalarǵa qarsy jasalatyn qylmys 17%-ǵa azaıǵan.