Qazaqstanda balalardy qarjy pıramıdasyna qarsy turýǵa úıretedi

NUR-SULTAN. QazAqparat - Elimizdegi balalar kıberalaıaqtyq áreketine qatysty saýatyn ashpaq. Bul týraly QR Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov málimdedi, dep habarlaıdy QazAqparat tilshisi.

«Tsıfrlyq saýatty arttyrý jáne balalar men stýdent jastardyń qarjylyq bilim alýyna erekshe kóńil bólinedi. 2020-2021 jyldary OYLA jastar ǵylymı-kópshilik jýrnalynda memlekettik jáne orys tilderinde alaıaqtyq pen qarjy pıramıdasyna qarsy is-qımyl taqyryby boıynsha 20 arnaıy qosymsha jarııalandy. Agenttik 2021 jyldan bastap qazaqstandyq mektepterde balalarǵa arnalǵan qarjylyq saýat boıynsha, onyń ishinde «Qaýipsiz ınternet jáne balalar kıberqaýipsizdigi» taqyrybynda 10-nan astam tegin sabaq ótkizdi», - dedi Nurlan Ábdirahmanov depýtattyq saýalǵa bergen jaýabynda.

Onyń málimetinshe, bıyl 29 sáýirden bastap mektepterde ınternet-alaıaqtyqqa jáne qarjy pıramıdalaryna qarsy is-qımyl taqyrybynda dáris ótkizý josparlanǵan.

«Agenttiktiń Qazaqstannyń joǵary oqý oryndary qaýymdastyǵymen yntymaqtastyǵy aıasynda «Turan» ýnıversıtetiniń bazasynda, joǵary oqý ornynyń saıtynda jáne áleýmettik jelilerde alaıaqtyq jáne qarjy pıramıdasyna qarsy is-qımyl taqyrybynda aqparattyq-túsindirme materıaldar jarııalanady. Sonymen qosa Fingramota.kz saıtynyń banneri jáne «FinIQ» baǵdarlamasynyń 38 beınerolıgi men 14 shyǵarylymy kórsetiledi», - deıdi ol.

Aıta keteıik, atalǵan joba aıasynda FinGramota.kz 20 sáýirden bastap qazaqstandyq mektepter men JOO-larda qarjy saýaty boıynsha aptalyq ótti.

Odan bólek, vedomstvo QQQ, AFM, Bas prokýratýra, sondaı-aq qarjylyq jáne qoǵamdyq uıymdarmen birlesip, oqýshylar men stýdentter úshin dárister, dóńgelek ústelder jáne olımpıadalar ótkizbek.

Qazirdiń ózinde Almaty qalasynda 15-ten astam oqý orny qamtyldy.