Qazaqstanda balalar tólqujatyna arnalǵan baj salyǵy eki ese tómendeıdi

ASTANA. QazAqparat – Balalar tólqujatyna arnalǵan baj salyǵyn 2 ese tómendetý usynylyp otyr. Bul týraly Májilistiń jalpy otyrysynda salyq máselesine arnalǵan zań jobasyn talqylaý kezinde QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Tirkeý fýnktsııasyn «Azamattarǵa arnalǵan úkimet» Memlekettik korporatsııasyna tapsyrýdy eskere otyryp, azamattyq hal aktilerin tirkeý úshin tólemderdi alyp tastaý usynylady. Budan bólek, tólqujattaǵy paraq sanyna qaraı Qazaqstan azamatynyń pasportyn berý úshin memlekettik bajdyń saralanǵan mólsherlemeleri, sondaı-aq balalar úshin memlekettik bajdy 2 esege tómendetý usynylady», - dedi Á. Qýantyrov.

Sonymen qatar, chek bermeý faktileri týraly habarlaǵany úshin syıaqy alý, ıpoteka nesıesi boıynsha bereshekti esepten shyǵarý, jaldaý qunyn tómendetý jáne turǵyn úıdi jalǵa alýǵa bıýdjettik sýbsıdııalar alǵan kezdegi salyq táýekelderi alynyp tastalady.

Atap aıtqanda, búgin palata depýtattary «Salyq jáne bıýdjetke tólenetin basqa da mindetti tólemder týraly» Kodeksine jáne «Salyq jáne bıýdjetke tólenetin basqa da mindetti tólemder týraly» Kodeksin qoldanysqa engizý týraly» Zańyna ózgerister men tolyqtyrýlar engizý týraly» zań jobasyn birinshi oqylymda qarap jatyr. Qujat Úkimettiń zań jobalaý jumystarynyń josparyna sáıkes jáne Memleket basshysynyń tapsyrmalaryn iske asyrý úshin ázirlendi.