Qazaqstanda balalar sýıtsıdin nasıhattaǵan 6 sheteldik saıt jabyldy - QR Bas prokýratýrasy
Bul týraly QazAqparat agenttiginiń resmı saýalyna Bas prokýratýradan habarlandy.
Atap aıtqanda, ınternet jelisinde sýıtsıdtik minez-qulyqty nasıhattaý balalar sýıtsıdin týdyratyn faktorlardyń birine aınalyp otyr. Bas prokýratýranyń atap ótýinshe, óz-ózine qol jumsaýdyń ádisteri ashyq jarııalanýda, sondaı-aq ınternet-saıttarda otyratyndardyń qarasy qalyń.
«Osyǵan baılanysty QR Baılanys jáne aqparat agenttigimen birlese prokýratýra organdary balalardyń ómirine jáne densaýlyǵyna qaýip týdyratyndaı is-qımyldarǵa túrtki bolatyn, onyń ishinde óz-ózine qol jumsaýǵa ıtermeleıtin ınternet-saıttarǵa monıtorıng júrgizý jáne olardy jabý jumystaryn júrgizýde. Prokýratýra organdarynyń talap-aryzy boıynsha sot sheshimderimen sheteldik alty ınternet-resýrstardyń taralýyna shekteý engizildi. Olar kámeletke tolmaǵandar arasynda sýıtsıdtik minez-qulyqty nasıhattaýmen aınalysqan»,-delingen habarlamada.
Vedomstvo málimetinshe, bıyldyń 6 aıynda kámeletke tolmaǵandar arasynda sýıtsıd oqıǵalary tómendedi (2013 jyldyń 6 aıynda 131 oqıǵa). Bıyl bundaı 98 oqıǵa tirkeldi. Sonymen qatar sýıtsıd jasaýǵa talpynǵandar sany azaıdy, óz-ózine qol jumsaýǵa áreket etýdiń 255 jaǵdaıy anyqtaldy (319).