Qazaqstanda balabaqshalarda bolatyn keleńsiz jaıttarǵa taldaý júrip jatyr

NUR-SULTAN. QazAqparat – Elimizdegi balabaqshalarda bolyp jatatyn túrli keleńsiz jáne daý-damaı jaǵdaılarǵa qatysty taldaý jumysy qolǵa alyndy. Bul týraly QR Oqý-aǵartý mınıstrliginiń bilim jáne ǵylym salasynda sapany qamtamasyz etý komıtetiniń tóraǵasy Gúlzat Kóbenova Oqu-ağartu LIVE efırinde aıtty, dep habarlaıdy QazAqparat tilshisi.

«Balabaqshalarda bolyp jatatyn keleńsiz jaıttar boıynsha búginde taldaý júrgizip jatyrmyz. Sońǵy bir jyl ishinde memlekettik attestatsııadan ótpeı qalǵan balabaqshalardaǵy basty másele - pedagogtardyń jetispeýshiligi. Kelesi jaıt - mamandardyń biliktiligin arttyrý. Sol sııaqty qaýipsizdik máselesi de mańyzdy bolyp otyr. Ata-analardyń pikirin eskerý maqsatynda balabaqsha qyzmetine qanshalyqty kóńili tolatyndyǵyna qatysty saýalnama júrgizip jatyrmyz», - dedi Gúlzat Kóbenova.

Komıtet basshysynyń málimdeýinshe balabaqshalarǵa qatysty atalǵan másele boıynsha 21 shilde de qoǵamdyq tyńdaý ótedi.

«Sońǵy 1 jyldyń ishinde balabaqsha jumysyna qatysty bizdiń komıtet pen óńirlik departamentterge 3 myńǵa jýyq aryz-ótinish kelip tústi. Kelip túsken ótinish-aryzdar boıynsha tıisti tekserý júrdi. Onyń qatarynda Nur-Sultan qalasy, Atyraý, Aqmola oblysy bar. Keıbir faktiler dáleldendi, nátıjesinde jaýapty tárbıeshi jumystan bosatyldy. Keıbir ata-analar tek bizge emes, quqyq qorǵaý organdaryna da júginip jatady. Sońǵy jarty jyldyń ishinde bizge osyndaı 15 shaǵym tústi. Ol boıynsha tıisti shara qabyldandy. Árıne, barlyq balabaqsha birdeı emes. Tıisti talapqa saı jumys isteıtin balabaqshalar da barshylyq», - deıdi ol.

Buǵan deıin elimizde balabaqshalardy lıtsenzııalaý 2024 jyldan bastalatynyn habarlaǵan edik.

Sondaı-aq, mınıstrlik ókili balabaqsha qyzmetin lıtsenzııalaý onyń sanyn azaıtýǵa alyp kelmeı me degen saýalǵa jaýap berdi.