Qazaqstanda bala psıhıkasyna keri áser etetin 800-ge jýyq saıt buǵattaldy

NUR-SULTAN. QazAqparat - QR Іshki ister mınıstrligi balalar men jasóspirimderdi zańsyz áreketterden qorǵaý baǵytynda júrgizilip jatqan sharalarmen tanystyrdy, dep habarlaıdy QazAqparat tilshisi.

«Elimizde tyıym salynatyn ınternet-resýrstardy anyqtaýǵa qatysty mınıstrlik tıisti sharalardy júrgizip jatyr. Onyń ishinde balalardyń damýy men psıhıkasyna áser etetin saıttar da bar. Sondaı-aq, kámeletke tolmaǵan balalar men jasóspirimderdiń atynan áleýmettik jelilerde jalǵan akkaýnt ashyp, zańsyz jáne balalarǵa qarsy qylmysqa ıtermeleýge baǵyttalǵan kontenti bar ınternet-resýrstardy aıqyndaýǵa kiristik. Jyl basynan beri ınternet keńistigine monıtorıng júrgizý arqyly 6 myńǵa jýyq pornografııalyq saıt anyqtalǵan. Nátıjesinde onyń 800-ge jýyǵy buǵattaldy», - dedi QR Іshki ister mınıstriniń birinshi orynbasary Marat Qojaev OKQ-de ótken baspasóz máslıhatynda.
Vıtse-mınıstrdiń sózine sensek, elimizde kámelet jasyna tolmaǵandardyń ólimmen aıaqtalatyn qylmystardy jasaý kórsetkishi 62% azaıǵan.
«Búginde mektepterde 2 myńnan astam tártip saqshysy balalarmen jumys isteıdi. Elimiz boıynsha 7 myńnan astam mektep bar. Osy oraıda bizge balalar jáne jasóspirimdermen jumys isteıtin taǵy 2 myńdaı polıtseı kerek. Sondaı-aq, bizdiń mamandar balalarmen qatar, olardyń ata-anasymen de tikeleı jumys isteıdi», - dedi ol.