Qazaqstanda azyq-túliktiń qandaı túrleri arzandady
«Halyqty alańdatyp otyrǵan mańyzdy máselelerdiń biri - azyq-túlik baǵasy. Tótenshe jaǵdaı kezinde biz 9 áleýmettik mańyzy bar azyq-túlik taýarlarynyń (kúrish, un, qaraqumyq, nan, jumyrtqa, kúnbaǵys maıy) shekti baǵasyn belgiledik. Naryqtyq ekonomıkada taýarlar baǵasy suranys pen usynystyń balansymen anyqtalady. Degenmen bul memlekettiń yqpal etý tetigi joq degendi bildirmeıdi. Áleýmettik mańyzy bar azyq-túlik taýarlaryna baǵany turaqtandyrý máselesi Úkimet, ortalyq jáne jergilikti basqarý organdarynyń turaqty baqylaýynda», - dedi Azamat Asqaruly OKQ-da ótken baspasóz máslıhatynda.
Onyń aıtýynsha, jyl basynan 21 shildege deıin azyq-túlik taýarlarynyń baǵasy 5,7 paıyzǵa ósken. Áıtse de bul sońǵy bes jyldaǵy rekordtyq ósim dep aıtýǵa kelmeıdi. Azamat Asqaruly 2016 jyly bul kórsetkish birden 9,1 paıyzdyq, al 2019 jyly 7,7 paıyzdyq ósimdi kórsetkenin aıtady.
«Degenmen keıingi úsh aıda baǵanyń edáýir turaqtalǵany baıqalady. Mamyr aıynda baǵa ósimi 0,1 paıyzdyq ósimdi kórsetse, maýsymda ósken joq. Shildeniń alǵashqy úsh aptasy 0,1 paıyzdyq baǵa ósimimen aıaqtaldy. Áleýmettik mańyzy bar azyq-túlik taýarlary baǵasynyń eń joǵary ósimi Pavlodar (+11,9%) men Nur-Sultan (+11,8%) qalalarynda tirkeldi. Al eń tómengi ósim Almaty (+3,1%), Petropavlov (+4,7%) men Aqtaý (+4,8%) qalasynda baıqaldy. Jyl basynan beri áleýmettik mańyzy bar azyq-túlik taýarlary ishinde eń qymbattaǵandary - kartop (+43,3%), sábiz (+31,4%), sarymsaq (+20,3%) qaraqumyq jarmasy (+19,0%), qant (+10,7%) pen kúnbaǵys maıy (10,2%). Al baǵasy tómendegen azyq-túlik qataryna oramjapyraq (- 23,3%), jumyrtqa (-7,2%), kúrish (-7%), taýyq eti (-2,9%) men tuzdy (-1%) jatqyzýǵa bolady», - deıdi ol.