Qazaqstanda azyq-túlikti eksporttaýǵa salynǵan shekteýler alynady

NUR-SULTAN. QazAqparat - QR Aýyl sharýashylyǵy mınıstrligi 1 maýsymnan bastap azyq-túlik taýarlaryn eksporttaýǵa qoıylǵan shekteýler men kvotalardy toqtatady. Bul týraly QR Aýyl sharýashylyǵy mınıstri Saparhan Omarov málimdedi, dep habarlaıdy QazAqparat tilshisi.

«Shekteýler men kvotalar tótenshe jaǵdaı kezinde azyq-túlik qaýipsizdigin qamtamasyz etý maqsatynda engizilgen edi. Qazirgi ýaqytta tótenshe jaǵdaı alynyp, elimiz azyq-túlikpen tolyq qamtamasyz etilgen soń mınıstrlik 1 maýsymnan bastap shekteýlerdiń kúshin joıýdy josparlap otyr. Tıisti buıryq maquldanyp jatyr», - dedi S. Omarov Úkimet úıinde ótken brıfıngte.

Buǵan deıin QR Aýyl sharýashylyǵy mınıstrligi tótenshe jaǵdaı kezinde birqatar aýyl sharýashylyǵy ónimderin kvota boıynsha eksporttaýǵa ruqsat berip, keı azyq-túlik taýarlaryn elden shyǵarýǵa tyıym salǵan edi.