Qazaqstanda azyq-túlik taýarlary qory qansha

NUR-SULTAN. QazAqparat - QR Aýyl sharýashylyǵy mınıstrligi negizgi azyq-túlik taýarlarynyń 32 túri boıynsha óńirlerdiń qamtamasyz etilýine apta saıyn monıtorıng júrgizýdi jalǵastyrady, dep habarlaıdy QazAqparat.

Bul monıtorıng turaqtandyrý qorlaryndaǵy, iri saýda jelilerindegi, jetkizýshiler men qaıta óńdeý kásiporyndarynyń qoımalaryndaǵy qorlardy eskeredi.

Óńirlerdiń jedel derekterine sáıkes, qazirgi ýaqytta respýblıka boıynsha 795 myń tonna kóleminde túrli azyq-túlik taýarlarynyń qory bar. Onyń ishinde óndirýshi kásiporyndarda 298 myń tonna, qoımalarda – 93,2 myń tonna, saýda jelilerinde – 353,2 myń tonna, turaqtandyrý qorlarynda – 19,8 myń tonna. Sonymen qatar, 325 mln jumyrtqa men 3,5 mln tonna azyq-túlik bıdaıy bar.

«Osyǵan oraı, tez buzylatyn ónimderdiń qory bir apta nemese odan da kóp ýaqytqa, al uzaq merzimdi saqtaý ónimderiniń birneshe aıǵa jetkilikti qory jınaqtalǵan. Aıta keter jáıt, azyq-túlik óndirisi artyp keledi jáne qorlar únemi jańartylyp, tolyqtyrylyp otyrady. Sondyqtan olar boıynsha tapshylyq joq», - delingen mınıstrliktiń baspasóz qyzmeti taratqan aqparatta.