Qazaqstanda azyq-túlik pen taýarlar baǵasy tómendeýi múmkin

ALMATY. QazAqparat - Ortalyq Azııada kóterme-bólshek saýda ortalyqtaryn ashý boıynsha aýqymdy jobanyń iske qosylýyna baılanysty aldyn ala jasalǵan derekter boıynsha Qazaqstandaǵy taýar baǵasy aıtarlyqtaı tómendemek, dep habarlaıdy QazAqparat tilshisi.

Kóterme-bólshek saýda ortalyqtarynyń júıesi atalǵan aımaqtaǵy elderde azyq-túlik, kókenis, halyqtyq taýarlar satýmen aınalysatyn saýda kásiporyndarynyń bazasyna negizdelgen. Endi ortalyq bazasynda belgili týarlar saqtalatyn bolady. Ony kóterme jáne bólshek saýdamen aınalysatyndar aldyn ala tapsyrys boıynsha da ala alady.

«Buryn saýdagerler taýarǵa ózi baratyn bolsa, endi ony ortalyqqa jetkizetin bolamyz. Satýshyǵa endi Qyrǵyzstanǵa baryp, alyp-satarlardy jaldaýdyń qajeti joq. Endi osy júıe boıynsha taýar aradaǵy deldalsyz tikeleı ortalyqtarǵa túsedi. Sonyń arqasynda baǵa tómendeıdi. Taýar konsıgnatsııa sharty boıynsha satylady, ıaǵnı, konsıgnant (taýar ıesi) taýaryn qoımaǵa ótkizý arqyly satýshyǵa bere alady. Osy jaǵdaıda, taýar tolyǵymen satylǵanǵa deıin ıesiniń múlki bolyp esepteledi. Bul taýar aınalymyna dem beredi»,-dedi Qazaqstan Saýda kásiporyndary qaýymdastyǵynyń prezıdenti Nursadyq Ábishev.

Kóterme-bólshek saýda ortalyqtary jobasyna qazaqstandyq taraptan Almatydaǵy «Mızam» saýda ortalyǵy, Astanadaǵy «Bıg Shanhaı», Atyraýdaǵy «Dına» kesheni qatyssa, Qyrǵyz eli tarapynan Ortalyq Azııadaǵy iri saýda orny «Dordoı» bazary enbek. Bolashaqta jobaǵa Ózbekstan men Reseıdiń de qatysýy yqtımal.

Qazirgi ýaqytta Qazaqstan Saýda kásiporyndary qaýymdastyǵy, Qyrǵyzstan bazarlar men saýda kásiporyndary qyzmetiniń qaýymdastyǵy jáne «Soıýzplodovoş» halyqaralyq qaýymdastyǵy atalǵan jobaǵa 30 mln teńge ınvestıtsııa saldy. 8 tamyzdan bastap, onlaın-alańdardyń tolyq nusqasy iske qosylady.