Qazaqstanda Ázerbaıjan Respýblıkasynyń mádenıet kúnderi ótedi

<p>ASTANA. KAZINFORM &mdash; Ázerbaıjan prezıdenti Ilham Álıevtiń Qazaqstanǵa resmı sapary barysynda Memleket basshysy Qasym-Jomart Toqaev eki eldiń qarym-qatynasyn nyǵaıtýda mádenıet salasyndaǵy ózara is-qımyl erekshe ról atqaratynyn atap ótti. Nátıjesinde ózara Mádenıet kúnderin ótkizý týraly kelisim jasaldy.</p>

Mádenıet jáne aqparat mınıstrliginiń baspasóz qyzmeti málimetinshe, 2024 jylǵy 24-26 qyrkúıek aralyǵynda Astanada Ázerbaıjan mádenı kúnderi ótedi. 24 qyrkúıekte «Fızýlı-530» kitabynyń tusaýkeseri jáne etno-djaz kontserti ótedi.

25 qyrkúıekte Qazaqstan men Ázerbaıjannyń ulttyq kitaphanalary arasynda memorandýmǵa qol qoıý, Elmıra Ahýndova kitabynyń tusaýkeseri, sonymen qatar «Ázerbaıjan óneriniń jaýharlary» kórmesiniń ashylýy jáne bı ansambliniń kontserti ótedi.

26 qyrkúıekte Ázerbaıjannyń zamanaýı óneri jáne Tomırıs ıkonografııasy týraly dárister ótkiziledi.

Basty is-shara 26 qyrkúıek kúni Q.Qýanyshbaev atyndaǵy Ulttyq mýzykalyq-drama teatrynda ótedi. Gala-kontsertte Ázerbaıjannyń halyq ártisteri óner kórsetedi.

Aıta keteıik, 2023 jyldyń jeltoqsanynda Qazaqstan Respýblıkasynyń Ázerbaıjan Respýblıkasyndaǵy Mádenıet kúnderi Baký qalasynda ótti.