Qazaqstanda azamattyq nekege turýshylar sany ósken

ASTANA. QazAqparat – Sońǵy jyldary Qazaqstanda azamattyq nekege turýshylar sany artyp keledi, dep habarlaıdy QazAqparat Qazaqstandyq qoǵamdyq damý ınstıtýtyna silteme jasap.

QQDI júrgizgen áleýmettaný zertteýleriniń nátıjeleri respondentterdiń «azamattyq neke» qubylysyna degen kózqarastary «oń», «teris», «beıtarap» dep atalatyn úsh topqa bólingenin kórsetti. Oń kózqaraspen qaraıtyndardyń kórsetkishi – 28,3%, teris kózqaraspen qaraıtyndar – 33,1%, beıtaraptylyq ustanatyndardyń úlesi – 32,8%.

Bul zertteý Qazaqstandyq qoǵamdyq damý ınstıtýtynyń sarapshylary ázirlegen «Qazaqstandyq otbasylar-2022» ulttyq baıandamasynda jarııalanǵan. Zertteýde Qazaqstannyń 17 óńiri jáne 1200 adam qamtylǵan.

Ortasha alǵanda barlyq jastaǵy adamdardyń shamamen 25%-y oń pikirde bolsa jáne 30%-dan astamy azamattyq nekede turýǵa beıtarap qaraıdy, ıaǵnı qazaqstandyq qoǵamda árbir besinshi neke tirkelmeýi múmkin.

«Saýalnamaǵa qatysqan 29-60 jas aralyǵyndaǵy turǵyndar azamattyq nekeni oń qabyldaıdy. Zeınetker nemese zeınetkerlik jastaǵy eresek urpaq otbasyna qatysty dástúrli kózqarastarǵa ıe. Bul urpaq AHAJ nemese AHAT organdarynda tirkelgen mártebesi bar otbasyn qabyldaýmen sıpattalady, bul resmı neke dep atalady. Ádette, aǵa býyn ókilderi dástúrli otbasylyq qundylyqtarǵa – er men áıel arasyndaǵy neke, endogamdyq toptan seriktes tańdaý, patrıarhaldyq baǵyttaǵy tolyq otbasyna baǵyttalǵan. Bul kontekste azamattyq nekege qatysty kózqarastardyń ózgerýi jasynan basqa, bilim berý, geografııalyq ornalasýy, etnostyq jáne t.b. sııaqty faktorlarǵa baılanysty bolýy múmkin. Saýalnama nátıjesi boıynsha qazaqtardyń azamattyq nekege jaǵymsyz kózqarasy orystarǵa qaraǵanda eki ese, basqa etnostyq toptarǵa qaraǵanda tórt ese joǵary», - dep jazylǵan «Qazaqstandyq otbasylar-2022» ulttyq baıandamasynda.

Aıta keteıik, Qazaqstandyq otbasylar-2022» baıandamasynyń tolyq nusqasy myna siltemede qoljetimdi.

Foto: myslo.ru